ఢిల్లీ వేదికగా నీట్  లీకేజీ వ్యవహారానికి వ్యతిరేకంగా కాక్రోచ్ జనతాపార్టీ ఆధ్వర్యంలో జరుగుతున్న ఆందోళనకు దేశ వ్యాప్తంగా యువత నుంచి విశేష స్పందన లభిస్తున్నది.     లీకేజీకి బాధ్యత వహిస్తూ.. కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే తన పదవికి రాజీనామా చేయాలని యువత డిమాండ్ చేస్తున్నారు.  ఈ నిరసనలకు రోజు రోజుకూ మద్దతు పెరుగుతుండటంతో.. ఇంత కాలంగా మౌనంగా ఉన్న ప్రధాని మోడీ అనివార్యంగా స్పందించాల్సి వచ్చింది. 

నీట్ పరీక్షల వివాదం చెలరేగిన తరువాత ఈ అంశంపై తొలి సారిగా ప్రధాని మోడీ   సోషల్ మీడియా వేదికగా..  మన దేశ యువత సంక్షేమం, వారి సమగ్ర భవిష్యత్తు కంటే ప్రభుత్వానికి మరేదీ ముఖ్యం కాదు పేర్కొన్నారు. పేపర్ లీకేజీలు, పరీక్షల నిర్వహణలో జరుగుతున్న అక్రమాలపై ప్రభుత్వం  కఠినంగా వ్యవహరిస్తుందనీ,  విద్యార్థుల భవిష్యత్తుతో ఆడుకునే వారిపై తక్షణమే   చర్యలు తీసుకోవడానికి ఇప్పటికే సంబంధిత  అధికారులకు ఆదేశాలు జారీ చేసినట్లు పేర్కొన్నారు.  

 పేపర్ లీకేజీలకు పాల్పడే నేరస్థులకు తీవ్రమైన శిక్షలు పడేలా చేయడానికి ప్రత్యేక ఫాస్ట్ ట్రాక్ కోర్టులను  ఏర్పాటు చేయాలని కేంద్రం నిర్ణయించిదన్న మోడీ,  విద్యార్థుల ప్రయోజనాలను కాపాడటానికి, వ్యవస్థపై మళ్లీ నమ్మకాన్ని పునరుద్ధరించడానికి వరుసగా తీసుకుంటున్న నిర్ణయాలలో ఇది కీలకమైన ముందడుగని తన సోషల్ మీడియా ప్రకటనలో పేర్కొన్నారు. భవిష్యత్తులో ఏ   విద్యార్థికీ అన్యాయం జరగకుండా వ్యవస్థలో విప్లవాత్మక మార్పులు తెస్తామని భరోసా ఇచ్చారు. అదే సమయంలో  ఆందోళనకారులకు, వారికి సంఘీభావంగా నిలుస్తున్న రాజకీయ పార్టీలకూ   పరోక్ష హెచ్చరిక చేశారు.  మన యువత ప్రకాశవంతమైన భవిష్యత్తుకు హాని తలపెట్టడానికి, ఆటంకం కలిగించడానికి ప్రయత్నించే వారిని ప్రభుత్వం ఎట్టిపరిస్థితుల్లోనూ వదిలిపెట్టదనీ, నిరసనల వెనుక ఏవైనా రాజకీయ ప్రయోజనాలు లేదా ఉద్దేశపూర్వక కుట్రలు ఉంటే వాటిని సహించేది లేదని మోడీ పేర్కొన్నారు.  

అయితే మోడీ స్పందన ఆందోళనకారుల, ముఖ్యంగా యువత ఆగ్రహాగ్నిని చల్లారుస్తుందా అంటే అనుమానమే అన్న సమాధానమే వస్తున్నది. యువత ప్రధానంగా లీకేజీకి బాధ్యత వహిస్తూ కేంద్ర విద్యామంత్రి ధర్మేంద్ర ప్రధాన్ రాజీనామాను డిమాండ్ చేస్తున్నది. అయితే మోడీ తన స్పందనలో ఆ డిమాండ్ ను అసలు పట్టించుకున్నట్లే కనిపించలేదు.  

NEET Row, PM Narendra Modi Reaction, NEET Paper Leak, Dharmendra Pradhan Resignation Demand