సినిమాల్లో కావొచ్చు, నిజ జీవితంలో కావొచ్చు. అన్న ఎవర్నయినా ప్రేమిస్తే తన చెల్లిని ప్రేమ రాయబారిగా ఉపయోగించుకుంటాడు. అన్నయ్య ప్రేమలో పడితే అతగాడి చెల్లెలు ఎగిరి గంతులు వేస్తుంది. అయితే చెల్లి విషయంలో మాత్రం అందుకు రివర్స్. చెల్లెలు ప్రేమలో పడితేమాత్రం అన్నయ్య సహించలేదు. నానా న్యూసెన్సూ చేస్తాడు. దీనికి ఉదాహరణగా నిలిచే సంఘటన ప్రకాశం జిల్లా ఒంగోలులో జరిగింది. ఒంగోలులోని పులి వెంకటరెడ్డి కాలనీలో నివసించే రాణి అనే అమ్మాయి ఆరు నెలల క్రితం ఓ అబ్బాయితో ప్రేమలో పడింది. ఆ ప్రేమకు ఇంట్లోవారు.. ముఖ్యంగా రాణి అన్న తీవ్రంగా అభ్యంతరం తెలిపాడు. దాంతో రాణి ప్రియుడితో వెళ్ళిపోయి పెళ్ళి చేసుకుంది. మళ్ళీ ఈమధ్యే పుట్టింటికి రాకపోకలు చేస్తోంది. అయితే తమను కాదని ప్రేమపెళ్ళి చేసుకుందని చెల్లి మీద కోపం పెంచుకున్న అన్న బుధవారం నాడు ఆమె గొంతు కోశాడు. దాంతో రాణి తీవ్రంగా గాయపడింది. ప్రస్తుతం ఒంగోలులోని ఓ ప్రైవేట్ ఆస్పత్రిలో చికిత్స పొందుతోంది. గొంతుకోసిన అన్న పరారీలో వున్నాడు.