తెలంగాణలోని మహబూబ్ నగర్ జిల్లాలో భారీ బ్యాంకు దోపిడీ జరిగింది. దోపిడీ దొంగలు నాలుగు కోట్ల విలువైన నగలు, నగదు దోచుకుని వెళ్ళారు. మహబూబ్‌నగర్ జిల్లాలోని బాలానగర్‌ గ్రామంలో వున్న గ్రామీణ వికాస్ బ్యాంకులో ఈ భారీ దోపిడీ జరిగింది. గ్యాస్ కట్టర్లను ఉపయోగించి దొంగలు దోపిడీ చేశారు. ఈ దోపిడీలో నాలుగు కోట్ల రూపాయల విలువైన బంగారు నగలతో పాటు 16-18 లక్షల రూపాయల నగదు కూడా దొంగలపాలైంది. ప్రతిరోజూ ఏ సమయంలో అయినా రద్దీగా వుండే జాతీయ రహదారి పక్కనే, పోలీస్ స్టేషన్, జనావాలసాల దగ్గర్లోనే ఉన్న ఈ బ్యాంకు లోపలకి వెనుక భాగం నుంచి ప్రవేశించారు. బ్యాంకులో రైతులు తాకట్టు పెట్టిన బంగారం భారీ స్థాయిలో పోయినట్టు సమాచారం. బ్యాంకు సిబ్బంది ప్రమేయం, సెక్యూరిటీ గార్డు ప్రమేయం ఏమైనా ఉన్నాయా అనే కోణంలో పోలీసులు దర్యాప్తు చేస్తున్నారు.