మైనారిటీలకు 12 శాతం కల్పిస్తామంటూ తెలంగాణ రాష్ట్ర ప్రభుత్వం ప్రకటించడాన్ని బీజేపీ నాయకుడు, సికింద్రాబాద్ పార్లమెంట్ సభ్యుడు బండారు దత్తాత్రేయ ఆక్షేపించారు. గతంలో కాంగ్రెస్ ప్రభుత్వం ఇలాగే మతపరమైన రిజర్వేషన్లు కల్పిస్తామనంటూ ప్రకటించినప్పుడు మతపర రిజర్వేషన్లు రాజ్యాంగ విరుద్ధమంటూ కోర్టులు కొట్టివేసిన విషయాన్ని ఆయన ఈ సందర్భంగా గుర్తు చేశారు. టీఆర్ఎస్ ప్రభుత్వం కాంగ్రెస్ ప్రభుత్వం బాటలోనే నడుస్తున్నట్టు కనిపిస్తోందని ఆయన విమర్శించారు. ఈ విషయంలో టీఆర్ఎస్ ప్రభుత్వం కోర్టులను కూడా దృష్టిలో పెట్టుకోవాలని ఆయన అన్నారు. టీఆర్ఎస్ ఓట్ల రాజకీయాల దృష్టితోనే ముస్లింల మీద ప్రేమను కురిపిస్తోందని దత్తాత్రేయ విమర్శించారు. ఈ సందర్భంగా ముఖ్యమంత్రి కెసిఆర్‌కు దత్తాత్రేయ పలు ప్రశ్నలు సంధించారు. తెలంగాణ పిల్లలకు మాత్రమే ఫీజు రీఎంబర్స్‌‌మెంట్ చేస్తామంటున్న ప్రభుత్వం, కేజీ నుంచి పీజీ వరకు ఉచిత విద్య అందిస్తామని చెప్పిందని గుర్తు చేశారు. అయితే తెలంగాణలో ఉన్న పేద విద్యార్థులందరికీ ఇది వర్తిస్తుందా లేదా? ఫీజు రీఎంబర్స్‌మెంట్‌ పథకం కేజీ టు పీజీ విద్యలో భాగం కాదా అని ప్రశ్నించారు. స్థానికత అంశం, ముల్కీ నిబంధన ఒక్కటే కాదా? ముల్కీ ఆధారంగానే 371 (డి)కు తుది రూపమిచ్చిన విషయం వాస్తవం కాదా అని దత్తాత్రేయ ప్రశ్నించారు.