దివంగత ఎన్.టి.రామారావు వారసులైన హరికృష్ణ, బాలకృష్ణల మధ్య అగాధం నానాటికీ పెరుగుతున్నట్లు తెలుస్తోంది. ప్రస్తుతం ఉన్న రాజకీయ వాతావరణంలో నందమూరి తారకరామారావు లాంటి నాయకుడు అవసరమని రాజ్యసభ సభ్యుడు హరికృష్ణ అభిప్రాయపడ్డారు. జాతీయ రాజేకీయాలను శాసించటమే కాకుండా బోఫోర్స్ వంటి కుంభకోణాలను వెలుగులోకి తెచ్చిన రామారావు లేని లోటు ఇప్పుడు అర్థమవుతోందని ఆయన అంటున్నారు. ఈయన సోదరుడు బాలకృష్ణ మాట్లాడుతూ తన తండ్రి ఎన్టీఆర్ కు వారసునిగా చంద్రబాబు జాతీయ రాజకీయాల్లో రాణిస్తున్నారని కితాబిచ్చారు. హరికృష్ణ మాటలకు, బాలకృష్ణ కితాబుకు మధ్య ఉన్న తేడా ఆ కుటుంబంలో ఉన్న విబేధాలను బయటపెడుతోంది. ఇటీవల తెలుగువన్.కామ్ లో వచ్చిన నారా లోకేశ్ కథనం, నందమూరి కుటుంబంలో చిచ్చు కథనం యదార్థమని ఈ రెండు ప్రకటనలూ నిరూపిస్తున్నాయి. ప్రత్యేకించి లోకేశ్, చంద్రబాబు వారసునిగా పార్టీలో కాలుమోపడం హరికృష్ణ కుటుంబానికి ఇష్టం లేనట్టుంది. అందుకే ఆయన ప్రస్తుత పరిస్థితుల్లో ఎన్టీఆర్ లాంటి వ్యక్తి అవసరమని నొక్కిచెప్పారు. ఇంకో గూఢార్థం వచ్చేలా తన కుమారుడు జూనియర్ ఎన్టీఆర్ అవసరమని చెప్పలేక ఇలా అని ఉంటారని గుసగుసలు వినిపిస్తున్నాయి.