ప్రముఖ నటుడు, టిడిపి అధినేత వియ్యంకుడు నందమూరి బాలకృష్ణ ఎన్నికలలో పోటీచేసే విషయంపై ఎలాంటి నిర్ణయం తీసుకోలేదని అన్నారు. పార్టీ అధ్యక్షులు నారా చంద్రబాబు నాయుడుతో చర్చించిన అనంతరం తాను ఎక్కడి నుండి పోటీ చేసేది చెబుతానని చెప్పారు. ఆయన నటించిన 'లెజెండ్' సినిమా హిట్ కావడంతో ఈ రోజు ఉదయం సింహాద్రి అప్పన్నను దర్శించుకున్నారు. అనంతరం మీడియాతో మాట్లాడుతూ..పార్టీ ఆదేశిస్తే ఎన్నికల ప్రచారంలో పాల్గొంటానని అన్నారు. తన తండ్రి స్థాపించిన పార్టీని బలపర్చడం తన బాధ్యతని..అలాగే అభిమానుల కోసం నటిస్తూ.. వినోదం పంచాల్సి ఉందని చెప్పారు. తాను రానున్న ఎన్నికల్లో పోటీ చేస్తానని బాలయ్య గత ఏడాది చెప్పారు. అప్పటి నుండి ఆయన పోటీ చేసే స్థానంపై చర్చతో పాటు ఉత్కంఠ కొనసాగుతోంది.