ఏపీలో 25 శాతం పెరిగిన మద్యం ధరలు...
Published on: Sun May 3, 2020 3:35PM
ఏపీలో కరోనా వైరస్ నేపథ్యంలో లాక్ డౌన్ విధించడంతో మద్యం దొరక్క అల్లాడుతున్న వారికి ప్రభుత్వం బ్యాడ్ న్యూస్ చెప్పింది. రేపటి నుంచి సడలింపుల్లో భాగంగా మద్యం దొరుకుతుందని ఎంతో ఆశగా ఎదురుచూస్తున్న మద్యం ప్రియులకు 25 శాతం ధరలు పెంచుతున్నట్లు ప్రభుత్వం చేసిన ప్రకటన మింగుడు పడటం లేదు. మద్యం విక్రయాలను నిరుత్సాహ పరిచే క్రమంలో ఈ నిర్ణయం తీసుకున్నట్లు సీఎం జగన్ సమీక్షలో నిర్ణయించారు. దీంతో మందుబాబులు ఒక్కసారిగా షాక్ కు గురవుతున్నారు. మద్య నియంత్రణలో భారంగా ఇప్పటికే తొలి ఏడాది 20 శాతం దుకాణాలను మూసేసిన ప్రభుత్వం... అదనపు పన్నులను సైతం వడ్డించింది. అంతటితో ఆగకుండా ఇప్పుడు కరోనా లాక్ డౌన్ నేఫథ్యంలో నష్టపోయిన మొత్తాన్ని కూడా వీరి నుంచే వసూలు చేయాలని నిర్ణయించినట్లు అర్దమవుతోంది. కేంద్ర ప్రభుత్వ మార్గదర్శకాల ప్రకారం రేపటి నుంచి మద్యం దుకాణాలు తెరుస్తుండగా.. రేట్లను పెంచడం మాత్రం తథ్యమని చెబుతోంది. అలాగే మద్యం దుకాణాల వల్ల సామాజిక దూరం పాటించడంతో పాటు ఇతర ఆంక్షలను కూడా విధిస్తోంది. దీంతో మద్యం దుకాణాలకు రావాలంటేనే మందుబాబులు బెంబేలెత్తుతున్నారు.


