ఆంధ్రప్రదేశ్ ముఖ్యమంత్రి చంద్రబాబు నాయుడు నాయకత్వంలోని ప్రతినిధి బృందం ఛత్తీస్‌ఘడ్ రాజధాని రాయ్‌పూర్‌కి చేరుకుంది. చంద్రబాబుతోపాటు ఈ పర్యటనలో మంత్రులు దేవినేని ఉమామహేశ్వరరావు, నారాయణ, రావెళ్ళ కిషోర్ బాబుతోపాటు నీటి పారుదల శాఖకు చెందిన ఉన్నతాధికారులు, పదిహేను మంది పారిశ్రామికవేత్తలు రాయ్‌పూర్‌కు చేరుకున్నారు. అక్కడి నుంచి ఛత్తీస్‌ఘడ్ కొత్త రాజధాని నయా రాయ్‌పూర్‌ని సందర్శించడానికి చంద్రబాబు బృందం బయల్దేరింది. ఛత్తీస్‌ఘడ్ పర్యటన సందర్భంగా చంద్రబాబు అక్కడి ముఖ్యమంత్రి రమణ్‌సింగ్‌ని కూడా కలుస్తారు. పోలవరం ప్రాజెక్టుకు సంబంధించిన ముంపు గ్రామాలు కొన్ని ఆ రాష్ట్రంలో కూడా వున్నాయి. వాటికి సంబంధించి రమణ్‌సింగ్‌తో చంద్రబాబు మాట్లాడతారు.