ఆంధ్రప్రదేశ్ శాసనసభ నిరవధికంగా వాయిదా పడింది. చివరిరోజున పలు అంశాలపై చర్చించారు. తెలుగుదేశం శాసనసభ్యురాలు అనితపై వైసీపీ ఎమ్మెల్యే రోజా చేసిన వ్యాఖ్యలను సభ తీవ్రంగా ఖండించింది. చర్చ జరుగుతున్న సమయంలో ఎమ్మెల్యే అనిత కంటతడి పెట్టారు. అనంతరం బాక్సైట్ తవ్వకాలు, ఇసుక విధానంపై సభలో చర్చించారు. ఆ తర్వాత సభను నిరవధికంగా వాయిదా వేస్తున్నట్టు స్పీకర్ కోడెల శివప్రసాదరావు ప్రకటించారు. ఐదురోజులపాటు జరిగిన ఏపీ శాసనసభ శీతాకాల సమావేశాల్లో మొత్తం 18 గంటల 34 నిమిషాలపాటు సభా సమయాన్ని అధికార, ప్రతిపక్షాలు వినియోగించుకున్నాయి. ఇందులో అధికార తెలుగుదేశం పార్టీ 14 గంటల 42 నిమిషాల సమయాన్ని, ప్రతిపక్షం వైసీపీ 2 గంటల 14 నిమిషాల సమయాన్ని, బీజేపీ గంటన్నర సమయాన్ని వినియోగించుకున్నాయి. ముఖ్యమంత్రి చంద్రబాబు 2 గంటల 19 నిమిషాలు మాట్లాడారు. ప్రతిపక్ష నాయకుడు జగన్ 16 నిమిషాలు, బీజేపీ నాయకుడు విష్ణుకుమార్ రాజు 15 నిమిషాలు మాట్లాడారు.