ఆంధ్రప్రదేశ్ వాహనాలు తెలంగాణలోకి ప్రవేశించాలంటే త్రైమాసిక పన్ను కట్టాలంటూ తెలంగాణ ప్రభుత్వం వాదిస్తోంది. బుధవారం ఉదయం నుంచి తెలంగాణ సరిహద్దుల్లో ఆంధ్రప్రదేశ్ నుంచి వస్తున్న ఏపీ రిజిస్ట్రేషన్ వాహనాలను నిలిపేశారు. దీనిమీద ఆంధ్రప్రదేశ్ రవాణా మంత్రి సిద్దా రాఘవరావు స్పందిస్తూ దీనిపై గతంలో జారీ అయిన జీవో నంబర్ 43ని గౌరవించాలని, మార్చి 2015 వరకు ఎలాంటి పన్ను వసూలు చేయకూడదని చెప్పారు. అయినప్పటికీ తెలంగాణ ప్రభుత్వం దీనికి అనుకూలంగా స్పందించలేదు. ఈ నేపథ్యంలో ఈ అంశం మీద హైకోర్టు స్పందించింది. రవాణా పన్ను విషయంలో గతంలో జారీ అయిన జీవో నంబర్ 43 మార్చి 31, 2015 వరకు అమలులో వుంటుందని, దీనిని రెండు రాష్ట్ర ప్రభుత్వాలు గౌరవించాలని సూచించింది. హైకోర్టు జోక్యంతో తెలంగాణ ప్రభుత్వం సేకరించాలని భావించిన రవాణ పన్ను అంశానికి బ్రేక్ పడే అవకాశం వుంది.