ఆంధ్రప్రదేశ్ రాజధాని విషయంలో రాష్ట్ర ప్రభుత్వం గానీ, రాజధాని ఎంపిక కోసం కేంద్ర ప్రభుత్వం నియమించిన శివరామకృష్ణన్ కమిటీ కానీ ఇంకా ఎలాంటి నిర్ణయం తీసుకోలేదని ఆంధ్రప్రదేశ్ మంత్రి నారాయణ చెప్పారు. ఢిల్లీలో శివరామకృష్ణన్ కమిటీతో భేటీ అయిన అనంతరం నారాయణ మీడియాతో మాట్లాడారు. ఆంధ్రప్రదేశ్‌ రాజధాని రాష్ట్రంలోని 13 జిల్లాలకు అందుబాటులో వుండేలా వుండాలని, విజయవాడ - గుంటూరు మధ్య నీటి లభ్యత ఎక్కువగా వుందని ఆయన చెప్పారు. అయితే ఈ ప్రాంతంలో రాజధాని విషయంలో ఇంకా తుది నిర్ణయం తీసుకోలేదని నారాయణ స్పష్టం చేశారు. రాజధాని అంటే రవాణా సదుపాయలు కూడా బాగా వుండాలని, రాష్ట్రంలో నాలుగు జిల్లాలలోని ప్రాంతాలు రాజధాని ఏర్పాటుకు అన్ని విధాలా అనుకూలంగా కనిపిస్తున్నాయని ఆయన అభిప్రాయపడ్డారు. ఈ జిల్లాలు అన్ని ప్రాంతాలకు సమదూరంలో ఉంటాయన్నారు. ఈనెల 26వ తేదీన శివరామకృష్ణన్ కమిటీతో మరోసారి సమావేశం కానున్నట్టు మంత్రి నారాయణ తెలిపారు.