హెర్మూజ్ జలసంధి రక్షణ విషయంలో అమెరికా చేతులెత్తేసింది. ప్రపంచ చమురు రవాణాకు అత్యంత కీలకమైన హోర్ముజ్ జలసంధిని రక్షించుకోవాల్సిన బాధ్యత అమెరికాకు లేదన్ని అగ్రరాజ్యాధినేత డొనాల్డ్ ట్రంప్ కుండబద్దలు కొట్టేశారు. ఆ మార్గంలో చమురు రవాణాపై ఎక్కువగా ఆధారపడే దేశాలే హెర్మూజ్ జలసంధిని రక్షించుకోవాలని అల్టిమేటం ఇచ్చారు. హర్మూజ్ జలసంధి గుండా చమురు రవాణా ఆగిపోతే తీవ్రంగా నష్టపోయే ఏడు దేశాలూ అక్కడ తమ యుద్ధనౌకలను మోహరించాలన్నారు.  

 హెర్మూజ్ జలసంధి గుండా జరిగే చమరు రవాణా అమెరికాకు పెద్దగా అవసరం లేదన్న ఆయన.. తాము ఆ మార్గం గుండా కేవలం ఒక శాతం చమురునే పొందుతున్నట్లు గుర్తు చేశారు.   అమెరికా  సొంత ఇంధన వనరులతో స్వయం సమృద్ధి సాధించిందన్నారు. ఈ వ్యాఖ్యల వెనుక ఆయన లక్ష్యం ప్రధానంగా చైనా, జపాన్, కొరియా, ఫ్రాన్స్, బ్రిటన్ దేశాలేనని అవగతమౌతోంది.

 ఇరాన్‌తో నెలకొన్న యుద్ధ వాతావరణం కారణంగా ఇంధన ధరలు ఆకాశాన్ని తాకుతున్న వేళ.. అమెరికా హెర్మూజ్ జలసంధి విషయంలో చేతులెత్తేయడంపై ప్రపంచ వ్యాప్తంగా ఆగ్రహం వ్యక్తం అవుతోంది.  ఇప్పటికే బ్రిటన్ ఈ యుద్ధం తమది కాదనీ, తాము జోక్యం చేసుకోబోమని విస్పష్టంగా చెప్పేసింది. ఇతర దేశాలు కూడా ట్రంప్ అల్టిమేటంపై స్పందించడానికి ముందుకు రావడం లేదు.