విమానాలకు యమగండకాలం నడుస్తున్నట్టుగా వుంది. అందుకే వరుసపెట్టి విమాన దుర్ఘటనలు జరుగుతూ వున్నాయి. అల్జీరియా దేశానికి చెందిన అల్జీర్ ఎయిర్‌లైన్స్‌కి చెందిన ఏహెచ్ 5017 నెంబరు గల విమానం ఒకటి టేకాఫ్ అయిన కొద్దిసేపటికే అదృశ్యం అయ్యింది. ఎయిర్ ట్రాఫిక్ కంట్రోల్కు ఆ విమానంతో సంబంధాలు తెగిపోయాయి. రాడార్‌కి విమానం సిగ్నల్స్ అందడం లేదు. బుర్కినాఫాస్ నుంచి అల్జీర్స్‌.కి వెళ్తున్న ఈ విమానంలో మొత్తం 110 మంది ప్రయాణికులు, ఆరుగురు విమాన సిబ్బంది వున్నారు. మలేషియా ఎయిర్లైన్స్కు చెందిన ఎంహెచ్-370 విమానం నాలుగు నెలల క్రితం అదృశ్యం కాగా, దాని ఆచూకీ ఇంతవరకు తెలియరాలేదు. ఇటీవల రష్యా-ఉక్రెయిన్ సరిహద్దులలో మలేషియా ఎయిర్లైన్స్కు చెందిన ఓ విమానాన్ని క్షిపణి తాకడంతో అది కూలిపోయి అందులో ఉన్న మొత్తం 295 మంది మరణించారు. బుధవారం నాడు తైవాన్‌కి చెందిన విమానం కుప్పకూలి 51 మంది మరణించారు. తాజాగా గురువారం నాడు అల్జీర్స్ విమానం 116 మందితో మాయమైపోయింది.