కొన్ని సంవత్సరాల క్రితం వరకూ డాన్సర్‌గా అనేక వందల సినిమాల్లో నటించిన అల్ఫోన్సా గుర్తుండే వుంటుంది. సినిమా కెరీర్ ముగిసిన తర్వాత అల్ఫోన్సా మీద అనేక ఆరోపణలు వచ్చాయి. ‘అలాంటి’ కేసులో ఒకసారి ఆమెను పోలీసులు అరెస్టు చేశారు కూడా. ఇప్పుడు అల్ఫోన్సా మరో కేసులో ఇరుక్కుంది. ఆమె తన భర్తను కిడ్నాప్ చేసిందంటూ చెన్నైకి చెందిన ఓ మహిళ పోలీసులకు ఫిర్యాదు చేసింది. తాను 2013 సంవత్సరంలో జయశంకర్ అనే యువకుడిని ప్రేమించి పెళ్ళి చేసుకున్నానని, ఆయనతో బుద్ధిగా కాపురం చేసుకుంటున్నానని ఆ మహిళ చెప్పింది. కొద్ది రోజుల క్రితం తన భర్తను అల్ఫోన్సా కిడ్నాప్ చేసి తన ఇంట్లో బంధించిందని, తన భర్తని వదిలిపెట్టమని చెబితే తనను బెదిరిస్తోందని ఆ మహిళ పోలీసులకు ఫిర్యాదు చేసింది. నా భర్తను ఎందుకు కిడ్నాప్ చేశావని అల్ఫోన్సాని అడిగితే, నీకంటే ముందు నేను అతన్ని పెళ్ళి చేసుకున్నాను... కాబట్టి నువ్వే అతన్ని వదిలిపెట్టి వెళ్ళిపోవాలంటూ బెదిరిస్తోందని ఆ మహిళ పోలీసులకు తెలిపింది.