తమిళనాడులో విశ్వరూపం సినిమా నిషేధం సృష్టించిన సంచలనం అంతా ఇంతా కాదు. ఆ తరువాత కొన్ని సీన్లు, కొన్ని మాటలు తొలగించి సినిమాను విడుదల చేశారు. ఈ సినిమా వివాదంలో కమల్ హాసన్ నేను అవసరమయితే దేశం విడిచి వెళ్తానని ప్రకటించడం సంచలనం రేపింది. తాజాగా రాంగోపాల్ వర్మ తీసిన ముంబయి దాడులు ‘26/11’ సినిమా మీద తాజాగా హైకోర్టులో పిటీషన్ దాఖలయింది. ఈ సినిమా విడుదలను ఆపేయాలని న్యాయవాది తీగల రాంప్రసాద్ ఈ మేరకు పిటీషన్ దాఖలు చేశారు. ఈ సినిమాను విడుదల చేయడం మూలంగా ముంబయి దాడుల్లో మరణించిన వారి బంధువులు, బాధితులు మానసిక వేదనకు గురవుతారని అందుకే నిలిపేయాలని పిటీషనర్ పేర్కొన్నారు. మరి కోర్టు ఏం నిర్ణయిస్తుందో వేచిచూడాలి.