గాలి జనార్ధన్ రెడ్డికి బెయిల్ అనుమతికి ఐదు కోట్ల రూపాయలు తీసుకున్నారనే అవినీతి ఆరోపణలపై సీబీఐ ప్రత్యేక న్యాయమూర్తి పట్టాభిని సస్పెండ్ చేస్తూ ఆంధ్రప్రదేశ్ హైకోర్టు చీఫ్ జస్టిస్ మదన్ బి. లోకూర్ ఆదేశాలను జారీ చేశారు. పట్టాభి రామారావు అరెస్టుకు తమకు అనుమతి ఇవ్వాలని సిబిఐ హైకోర్టు ప్రధాన న్యాయమూర్తిని కోరినట్లు తెలుస్తోంది. అనుమతి రాగానే ఆయనను సిబిఐ అరెస్టు చేస్తుందని అంటున్నారు. కాగా గాలి జనార్దన్ రెడ్డికి, పట్టాభి రామారావుకు మధ్య రిటైర్డ్ న్యాయమూర్తి చలపతి రావు మధ్యవర్తిగా వ్యవహరించినట్లు చెబుతున్నారు. ఆయనకు రెండు లాకర్లు ఉన్నాయి. గాలి జనార్దన్ రెడ్డికి బెయిల్ మంజూరు చేసిన తర్వాత సిబిఐ అధికారులు హైదరాబాదులోని బ్యాంకులపై నిఘా పెట్టినట్లు తెలుస్తోంది. అలాగే గాలి జనార్దన్ రెడ్డి అనుచరుల ఫోన్లను కూడా ట్యాప్ చేశారని అంటున్నారు. గాలి జనార్దన్ రెడ్డికి బెయిల్ రావడంలో ఐదుగురు కీలక పాత్ర పోషించినట్లు చెబుతున్నారు. వారిలో పట్టాభి రామారావు కుమారుడు, రిటైర్డ్ న్యాయమూర్తి చలపతిరావు, ఓ రాజకీయ నాయకుడు, ఓ రౌడీ షీటర్ ఉన్నట్లు చెబుతున్నారు.పట్టాభి రామారావు కుటుంబ సభ్యుల నుంచి సిబిఐ అధికారులు బ్యాంకు లాకర్లను స్వాధీనం చేసుకున్నారు.