మమత అధికారంలోకి వచ్చిన నాటి నుంచి ప్రజాస్వామ్య విధానాలకు విరుద్ధంగా, ఒక నియంతలా వ్యవహరిస్తున్నట్టు సర్వత్రా విమర్శలు వినవస్తున్నాయి. ఇటీవల సిఎన్ ఎన్ - ఐబిఎన్ టెలివిజన్ ఛానల్ నిర్వహించిన పత్యేక ఇంటర్వ్యూ కార్యక్రమం నుంచి మమత బెనర్జీ అర్ధంతరంగా వెళ్ళిపోయారు. ఇంటర్వ్యూ సందర్భంగా ఎన్ డిటివి రిపోర్టర్ అడుగుతున్న ప్రశ్నలకు ఆమె సమాధానం చెప్పకపోగా మీరు (విలేకరులు) కమ్యూనిస్టు అభిమానులంటూ రుసరుసలాడుతూ స్టూడియో నుంచి బయటకు వచ్చి ముఖం చాటేశారు. మమత రావడం విలేకరులను దూషించడం వంటి దృశ్యాలను చూసిన వారికి "ఒకే ఒక్కడు" సినిమాలో ముఖ్యమంత్రి పాత్రలో వున్న రఘువరన్ ఒక టెలివిజన్ ఛానల్ విలేకరి (హీరో అర్జున్) ఇంటర్వ్యూ చేస్తుండగా మధ్యలో లేచి వెళ్లిపోయే సీన్ గుర్తుకు వచ్చింది. తనకు వ్యతిరేకంగా ప్రశ్నించిన వారిని కమ్యూనిస్టులనే ముద్రవేస్తూ వారిపై విరుచుకుపడడం మినహా సమాధానం చెప్పడం లేదు. రాష్ట్ర వ్యాప్తంగా తృణమూల్ కాంగ్రెస్ కార్యకర్తల ఆగడాలు కూడా శ్రుతిమించుతున్నాయి. జోద్ పూర్ యూనివర్శిటీకి చెందిన అంభికేష్ మహాపాత్రో అనే ఫ్రొఫెసర్ ఒక కార్టునిస్టు కూడా. ఇటీవల ఆయన ఒక కార్టూన్ వేశారు. ఆ కార్టూన్ మమతా బెనర్జీకి వ్యతిరేకంగా వుందనే నెపంతో తృణమూల్ కాంగ్రెస్ కార్యకర్తల ఆగడాలు మితిమీరిపోతున్నాయి. ఒక యువతిపై అత్యాచారం చేసిన కేసులో తృణమూల్ కార్యకర్తల పోలీసులు అరెస్టు చేస్తే ఆమె స్వయంగా పోలీసులకు చెప్పి వారిని విడిపించారు. పత్రికల్లో వచ్చిన వార్తలు వాస్తవాలే అయినా అవి తనకుగాని, తనపార్టీ కార్యకర్తలకు గాని వ్యతిరేకంగా వుంటే ఆ వార్తలు రాసిన పత్రికలపై కక్షసాధింపు దోరణి అవలంభిస్తోంది.