వై.ఎస్.ఆర్. కాంగ్రెస్ అధినేత జగన్మోహన రెడ్డికి జై అన్న ప్రతి ఒక్కరూ విచారణ, దాడుల్లో ఏదో ఒకటి ఎదుర్కోక తప్పదని హెచ్చరికలు వెలువడుతున్నాయి. ఆ హెచ్చరికలకు తగ్గట్టుగానే వాతావరణమూ ఉందని పరిశీలనలో తేలుతోంది. అయితే మొన్నటి దాకా కాంగ్రెస్ లోనే కొనసాగుతానని ప్రకటించిన కాకినాడ ఎమ్మెల్యే ద్వారంపూడి చంద్రశేఖరరెడ్డి ఒక్కసారిగా జగన్ కు జై అన్నారు. దీంతో ఆయననూ సిబీఐ సాక్షి భవనాల కొనుగోలు లావాదేవీలపై విచారణ చేసింది. అలానే సిండికేట్ లోనే ఉంటూ పెత్తనం వెలగబెడుతున్న మామిడాల వెంకటేష్ 2014 వై.ఎస్.ఆర్. కాంగ్రెస్ పార్టీ కాకినాడ రూరల్ అభ్యర్థి. దాదాపుగా ఈ విషయం ఖరారైందని ఆ పార్టీ నేతలే చెబుతుంటారు. అటువంటి వెంకటేష్ ఇంటిపై ఎసిబి దాడులు జరిగాయి. వీరిద్దరి తరువాత రేసులో కాంగ్రెస్ నుంచి వై.ఎస్.ఆర్. కాంగ్రెస్ పార్టీకి మారిన ఆళ్ళ నాని ఉండవచ్చని తెలుస్తోంది. ఆయనకు, జగన్ కు ఉన్న సంబంధాలపై ఇంటలిజెన్స్ వర్గాలు దర్యాప్తు చేస్తున్నాయి. ఈ దర్యాప్తు ఆధారంగా ఆయనపై కూడా కక్షసాధింపు చర్యలు ఉండవచ్చని పరిశీలకులు భావిస్తున్నారు. ఇలానే వై.ఎస్. తోడల్లుడు వై.వి. సుబ్బారెడ్డి కూడా విశాఖ ఉడాను మోసం చేశారనే అభియోగం వెలుగులోకి వచ్చింది. ఈయనపై కూడా నిఘా పెరిగే అవకాశాలున్నాయి.