భారత్ కు చేరుకున్న కేరళ నర్సులు
Published on: Sat Jul 5, 2014 11:53AM

ఇరాక్ లో ఉగ్రవాదుల చేతులో చిక్కుకున్న కేరళ నర్సులు సురక్షితంగా ఇండియా చేరుకున్నారు. కుర్దిస్థాన్ రాజధాని ఎర్బిల్ నుంచి బయల్దేరిన 46 మంది కేరళ నర్సులు, 137 మంది భారతీయులు ఈ రోజు ఉదయం 9:30 నిమషాలకి ముంబై చేరుకున్నారు. ఇక్కడ నుంచి విమానం ఇంధనం నింపుకుని ఉదయం 11.55 గంటలకు కొచ్చి చేరుకోనుంది. అనంతరం 2.25 గంటలకు హైదరాబాద్, చివరిగా సాయంత్రం 5.50కి ఢిల్లీ చేరుకుంటుందని అధికారిక వర్గాలు పేర్కొన్నాయి. ఇరాక్ నుండి భారత్ చేరుకున్న నర్సులకు కొచ్చి విమానాశ్రయంలో ముఖ్యమంత్రి ఊమెన్ చాందీ స్వయంగా స్వాగతం పలకనున్నారు. అయితే ఇరాక్ లో భారత విమానం ల్యాండ్ అయ్యేందుకు అధికారులు తొలత అంగీకరించలేదు. చర్చలు, వివరణల తర్వాతే విమానం ల్యాండ్ అయ్యేందుకు వారు అగీకరించారు. ఆఖరికి నర్సులందరూ క్షేమంగా తిరిగి వచ్చారు.


