ఖమ్మం జిల్లాలో వర్షాలు విపరీతంగా కురుస్తున్నాయి. ఇంతకాలం చుక్క నీరులేక ఎండిపోయిన నోళ్ళు తెరిచిన ఖమ్మం జిల్లా భూములు ఇప్పుడు హాయిగా వాన నీటిని ఆస్వాదిస్తున్నాయి. ఖమ్మం జిల్లాలోని చింతూరులో 17.3 సెంటీమీటర్ల వర్షపాతం నమోదైంది. ఈ సీజన్‌లో ఖమ్మం జిల్లాలో ఇదే అత్యధిక వర్షపాతం. జిల్లాలోని కొత్తగూడెం, సత్తుపల్లి, ఇల్లందు, మణుగూరు ఓపెన్ కాస్ట్ గనుల్లోకి వర్షపు నీరు భారీగా చేరింది. దాంతో బొగ్గు ఉత్పత్తికి అంతరాయం కలిగింది. జిల్లాలోని తాలిపేరు రిజర్వాయర్‌కి భారీగా వరదనీరు చేరడంతో 17 వేల క్యూసెక్కుల నీటిని దిగువ ప్రాంతాలకు విడుదల చేశారు.