వైఎస్ ఆర్ కాంగ్రెస్ పార్టీ అధినేత జగన్మోహనరెడ్డికి పరిటాల రవి రూపంలో మరో ముప్పు ఎదురుకానుంది. 2005లో టిడిపి నాయకుడైన పరిటాల రవిని మొద్దుశ్రీను అనంతపురంలో కాల్చి చంపాడు. ఈ హత్య వెనుక జగన్ హస్తముందని అప్పట్లో ఆరోపణలు రావడంతో నాటి ముఖ్యమంత్రి రాజశేఖరరెడ్డి సిబిఐ విచారణకు ఆదేశించారు. ఈ హత్య కేసులో జగన్ ప్రమేయమేమీ లేదంటూ అప్పట్లో సిబిఐ తేల్చి చెప్పింది. అయితే నాటి ముఖ్యమంత్రి రాజశేఖరరెడ్డి సిబిఐను మేనేజ్ చేశారని, అందువల్ల జగన్ పాత్రపై మరోసారి విచారణ జరపాలని పరిటాల రవి భార్య, టిడిపి ఎమ్యెల్యే పరిటాల సునీత డిమాండు చేస్తున్నారు. ప్రభుత్వం కనుక తన డిమాండుకు అంగీకరించకపోతే ఆమరణ దీక్ష చేస్తానని ఆమె హెచ్చరిస్తున్నారు. అంతే కాకుండా తన భర్త హత్యపై పునర్విచారణ జరపాలంటూ ఆమె సిబిఐ ఉన్నతాధికార్లకు కూడా లేఖ రాయాలనుకుంటున్నారు. ఇప్పటికే పలుకేసులతో సతమతమవుతూ జ్యూడిషియల్ కస్టడీలో ఉన్న జగన్ కు పరిటాల హత్య కేసు రూపంలో మరో సమస్య ఎదురయ్యే అవకాశం కనిపిస్తోంది. పరిటాల సునీత ఈ అంశంపై గట్టిగా నిలబడితే ప్రభుత్వం మళ్లీ ఈ కేసు పునర్విచారణకు ఆదేశించినా ఆశ్చర్యపోనక్కర్లేదు.