తెలుగు సినిమా చరిత్రలో కుటుంబ బంధాలు, ఆత్మాభిమానం, త్యాగాలకు ప్రతీకగా నిలిచే అద్భుతమైన చిత్రాల్లో విక్టరీ వెంకటేష్ నటించిన 'సూర్యవంశం' మొదటి వరుసలో ఉంటుంది. 1998లో భీమనేని శ్రీనివాసరావు దర్శకత్వంలో తెరకెక్కిన ఈ చిత్రం బాక్సాఫీస్ వద్ద రికార్డు స్థాయి విజయాన్ని సాధించడమే కాకుండా, తెలుగు ప్రేక్షకుల హృదయాల్లో చెరగని ముద్ర వేసింది.
ఈ సినిమాలో భాను ప్రసాద్ పాత్రలో వెంకటేష్ చూపించిన అద్భుత నటన, అమాయకత్వం, బాధ్యతాయుతమైన ప్రవర్తన ప్రేక్షకుల హృదయాలను హత్తుకుంటాయి. ముఖ్యంగా భాను ప్రసాద్ జీవితంలోకి స్వప్నగా మీనా ప్రవేశించిన తర్వాత సాగే సన్నివేశాలు కథకు ఒక కొత్త మలుపును, ఎంతో భావోద్వేగాన్ని అందిస్తాయి.
ఈ చిత్రంలో మీనా, వెంకటేష్ మధ్య వచ్చే ఒక ప్రత్యేకమైన ఎమోషనల్ సన్నివేశం ఇప్పటికీ సోషల్ మీడియాలో, యూట్యూబ్ షార్ట్స్ రూపంలో వైరల్ అవుతూనే ఉంది.
ఒక శుభకార్యంలో స్వప్న(మీనా) తన స్నేహితులకు భాను ప్రసాద్ను పరిచయం చేసే సన్నివేశం ప్రతి ఒక్కరి చేత కంటినీరు పెట్టిస్తుంది. చదువు రాలేదని, హోదా లేదని భాను ప్రసాద్ను కాదని మాధవి(సంఘవి) వేరే వ్యక్తిని పెళ్లి చేసుకుంటుంది. పైగా ఆ శుభకార్యంలో "పరిచయం చేయడానికి గొప్ప స్టేటస్ ఉన్న వీఐపీ ఏంకాదులే" అంటూ ఫ్రెండ్స్ ముందు భాను ప్రసాద్ని అవమానిస్తుంది. అప్పుడు స్వప్న వచ్చి అతని గొప్పతనాన్ని చాటిచెప్పే ఘట్టం ఈ సినిమాలోని ప్రధాన హైలైట్లలో ఒకటిగా నిలుస్తుంది.
సమాజంలో హోదా, డబ్బు మాత్రమే మనుషుల గొప్పతనాన్ని నిర్ణయించలేవని.. వ్యక్తిత్వం, మనస్సు ఎంత గొప్పవో చాటిచెప్పేలా ఆ సన్నివేశంలో సంభాషణలు ఉంటాయి. "చిల్లర భిక్షంగా వేసేవారు ఉంటారు, అన్నం భిక్షంగా వేసేవారు ఉంటారు.. కానీ జీవితాన్నే భిక్షగా వేసిన గొప్ప మనస్సు ఉన్న మనిషి మా చిన్నబావ" అంటూ మీనా చెప్పే డైలాగ్స్ ప్రేక్షకుల గుండెల్లో గుచ్చుకుంటాయి.
ఎంతోమందికి భవిష్యత్తును ఇచ్చినా, వారు కృతజ్ఞత మరచిపోయినా సరే, ఏమాత్రం స్వార్థం లేకుండా ఉండే భాను ప్రసాద్ వ్యక్తిత్వాన్ని ఆమె వర్ణించే తీరు అత్యంత భావోద్వేగభరితంగా ఉంటుంది. వెంకటేష్ కళ్ళలో కనిపించే ఆవేదన, ఆ తదనంతరం మీనా మాటలు విన్నప్పుడు అతని ముఖంలో మారే అభినయం నటుడిగా వెంకటేష్ విశ్వరూపాన్ని చూపుతాయి.
సూర్యవంశం సినిమా విడుదలై దశాబ్దాలు గడుస్తున్నా, ఈ సన్నివేశం నేటికీ విపరీతమైన ఆదరణ పొందుతూనే ఉంది.
Suryavamsam, Emotional Scene, Venkatesh, Meena
