తెలుగు చలనచిత్ర పరిశ్రమ చరిత్రను 'ఎన్‌టీఆర్‌కు ముందు.. ఎన్‌టీఆర్‌కు తర్వాత' అని విభజించవచ్చు. ప్రపంచవ్యాప్తంగా ఉన్న తెలుగు వారందరికీ ఆరాధ్య దైవంగా, క్రమశిక్షణకు మారుపేరుగా నిలిచిన నందమూరి తారక రామారావు వెండితెరపై అడుగుపెట్టి నేటికి దశాబ్దాలు గడిచినా, ఆయన తొలి చిత్రం 'మన దేశం' నాటి జ్ఞాపకాలు నేటికీ సజీవంగానే ఉన్నాయి.

1949లో విడుదలైన 'మన దేశం' సినిమాతో ఎన్‌టీఆర్ తన నట ప్రస్థానాన్ని ప్రారంభించారు. ఎల్వీ ప్రసాద్ దర్శకత్వంలో వచ్చిన ఈ చిత్రంలో ఆయన ఒక చిన్న పాత్రలో మెరిశారు. అయితే అది చిన్న పాత్ర అయినప్పటికీ, అందులో ఆయన చూపిన గాంభీర్యం, ఆ కంచు కంఠం అప్పట్లోనే ప్రేక్షకులను కట్టిపడేశాయి. ఒక సాధారణ యువకుడిగా సినిమా రంగంలోకి ప్రవేశించిన రామారావు, కాలక్రమేణా 'విశ్వవిఖ్యాత నటసార్వభౌముడు'గా ఎలా ఎదిగారో తెలుసుకోవాలంటే ఈ సినిమా ఒక ప్రాధాన్యత కలిగిన ఘట్టం.

ఈ చిత్రంలో ఎన్‌టీఆర్ ఒక పోలీస్ ఇన్‌స్పెక్టర్ పాత్రలో కనిపిస్తారు. స్వాతంత్య్ర‌ ఉద్యమ నేపథ్యంలో సాగే ఈ కథలో, నిక్కచ్చిగా వ్యవహరించే ఒక అధికారిగా ఆయన నటన అద్భుతం. ముఖ్యంగా ఒక సన్నివేశంలో ఆవేశంగా డైలాగ్స్ చెబుతున్నప్పుడు ఆయన ముఖంలో కనిపించే హావభావాలు, ఆ కళ్లలోని తీక్షణత భవిష్యత్తులో ఆయన పోషించబోయే మహోన్నత పాత్రలకు పునాదిలా అనిపిస్తాయి.

స్వాతంత్య్ర‌ సమరయోధులపై లాఠీఛార్జ్ చేయాల్సి వచ్చినప్పుడు ఆ పాత్రలో ఆయన ప్రదర్శించిన గంభీరమైన రూపం అప్పటి ప్రేక్షకులకు కొత్త అనుభూతిని ఇచ్చింది. 'మన దేశం' సినిమాలో ఎన్‌టీఆర్ ఎంట్రీ ఇచ్చినప్పుడు ఆయన వయసు చాలా తక్కువ, కానీ ఆ వయసులోనే ఒక అనుభవజ్ఞుడైన నటుడిలా ఆయన కెమెరా ముందు నిలబడటం విశేషం. ఈ సినిమాలో ప్రముఖ నటుడు చిత్తూరు నాగయ్య ప్రధాన పాత్ర పోషించగా, ఘంటసాల సంగీతాన్ని అందించారు.

నేడు మనం చూస్తున్న ఎన్‌టీఆర్ అద్భుతమైన పౌరాణిక, జానపద, సాంఘిక చిత్రాల ప్రయాణం ఈ 'మన దేశం'తోనే మొదలైంది. ఒక సాదాసీదా పోలీస్ అధికారి పాత్ర నుంచి దేవుడి పాత్రల వరకు ఆయన ప్రయాణం స్ఫూర్తిదాయకం. ఈ పాత తరం దృశ్యాలను చూస్తుంటే, ఒక మహా వృక్షం చిన్న విత్తనంలా ఎలా మొలకెత్తిందో అర్థమవుతుంది. నందమూరి అభిమానులకే కాకుండా, తెలుగు సినిమా ప్రేమికులందరికీ ఈ వీడియో ఒక అపురూపమైన కానుక. ఇలాంటి అద్భుత‌మైన వీడియోల కోసం మా Teluguone youtube channelను Subscribe చేసుకోండి.