తెలుగు సినిమా చరిత్రలో హాస్యానికి ఓ ప్రత్యేకమైన సువర్ణ అధ్యాయం ఉంది. జంధ్యాల, ఈవీవీ సత్యనారాయణ లాంటి దిగ్గజ దర్శకులు సృష్టించిన నవ్వుల ప్రపంచంలో ఎందరో మహానటులు తమ టైమింగ్‌తో ప్రేక్షకులను పొట్టచెక్కలయ్యేలా నవ్వించారు. అలాంటి వారిలో వైవిధ్యభరితమైన నటనకు కేరాఫ్ అడ్రస్ అయిన కోట శ్రీనివాసరావు, హాస్య బ్రహ్మ సుత్తివేలు కాంబినేషన్ ఒక అద్భుతం. వీరిద్దరి కలయికలో వచ్చిన ఎన్నో సీన్లు ఇప్పటికీ సోషల్ మీడియాలో మీమ్స్ రూపంలో, షార్ట్స్ రూపంలో హల్‌చల్ చేస్తూనే ఉన్నాయి.

ప్రస్తుతం యూట్యూబ్‌లో ట్రెండ్ అవుతున్న ఒక పాత తరం కామెడీ క్లిప్ చూస్తే, అప్పటి నటుల టైమింగ్ ఎంత సహజంగా ఉండేదో అర్థమవుతుంది. పోలీస్ స్టేషన్ బ్యాక్‌డ్రాప్‌లో సాగే ఈ ఐదు నిమిషాల సీన్, కేవలం సంభాషణలు, ముఖకవళికలతోనే నవ్వుల సునామీ సృష్టిస్తుంది. దొంగ సరుకు అమ్మాలంటూ షాప్ మేనేజర్ (సుత్తివేలు)ను బెదిరించే అన్నారావు (కోట శ్రీనివాసరావు) పాత్ర చుట్టూ ఈ కథ నడుస్తుంది. 

ఈ సీన్ లోని అసలు మజా అంతా పోలీస్ స్టేషన్‌లోనే మొదలవుతుంది. సుత్తివేలు కంప్లైంట్ ఇవ్వడానికి కోటను పోలీస్ స్టేషన్‌కు లాక్కొచ్చినప్పుడు, అక్కడి ఎస్ఐకి తన భార్య నుంచి ఫోన్ వస్తుంది. "వన్ మినిట్" అంటూ ఎస్ఐ లోపలికి వెళ్లడమే ఆలస్యం.. అన్నారావు తన అసలు స్వరూపాన్ని చూపిస్తూ సుత్తివేలును చితకబాదేస్తాడు. మళ్లీ ఎస్ఐ బయటకు రాగానే ఏమీ తెలియనట్టు అమాయకంగా చేతులు కట్టుకుని నిలబడతాడు.

ఇక్కడ హైలైట్ ఏంటంటే, పక్కనే ఉన్న కానిస్టేబుల్ కూడా కోట భయానికి లొంగిపోయి, "ఆయన కొట్టలేదు సార్, చేతులు కట్టుకునే ఉన్నాడు" అని అబద్ధం చెప్పడం. ఈ వన్ మినిట్ గ్యాప్‌లో జరిగే ఫైట్, ఆ తర్వాత సుత్తివేలు చెప్పే డైలాగులు థియేటర్లలో నవ్వుల పువ్వులు పూయించాయి. "ఆయన వన్ మినిట్ అని లోపలికి వెళ్తున్నాడు, వీడు ఆ వన్ మినిట్ లో నన్ను 50 షాట్స్ పీకుతున్నాడు, ఒళ్ళంతా పచ్చి పుణ్యం అయిపోయింది బాబు" అంటూ సుత్తివేలు పలికే డైలాగ్ టైమింగ్ అమోఘం.

చివరకు ఎస్ఐ భార్య ఫోన్ల గోల తట్టుకోలేక, కోట కొట్టే దెబ్బలు భరించలేక సుత్తివేలు రాజీకి రావడం ఈ సీన్‌కే హైలైట్. "మళ్ళీ ఉందంటే మీ ఆవిడ దగ్గర నుంచి ఫోన్ వస్తుంది.. మీ ఆవిడతో ఫోన్ లో మాట్లాడుతుంటే ఈయన నన్ను మళ్లీ 50 పీక్స్ పీకుతారు.. అసలు మేమిద్దరం గోచి పెట్టుకునే దశ నుంచి పేచీలు లేని స్నేహితులం" అంటూ కంప్లైంట్ వెనక్కి తీసుకోవడం అవుట్ అండ్ అవుట్ హిలేరియస్ గా సాగుతుంది.

ఈనాటి సినిమాల్లో డబుల్ మీనింగ్ డైలాగులు, బాడీ షేమింగ్ కామెడీలు ఎక్కువైపోతున్న తరుణంలో, ఇలాంటి క్లాసిక్ కామెడీ సీన్లు చూసినప్పుడు కలిగే ఆనందమే వేరు. ఎలాంటి అసభ్యత లేకుండా, కేవలం బాడీ లాంగ్వేజ్, డైలాగ్ డెలివరీతోనే తరాల పాటు గుర్తుండిపోయే హాస్యాన్ని పండించడం అప్పటి నటులకే సాధ్యమైంది. అందుకే ఈ వీడియోను చూసిన నెటిజన్లు "కోట, సుత్తివేలు కాంబినేషన్‌ను కొట్టే నటులు ఇప్పుడు లేరు" అంటూ కామెంట్ల వర్షం కురిపిస్తున్నారు. ఇలాంటి ఫ‌న్నీ వీడియోల కోసం మా Teluguone youtube channelను Subscribe చేసుకోండి.