తెలుగు సినీ తెరపై నటుడిగా, రచయితగా తనదైన ముద్ర వేసిన దివంగత నటులు గొల్లపూడి మారుతీరావు నటన ఎప్పటికీ అమరం. ముఖ్యంగా సమాజంలోని కుళ్లును, వ్యవస్థలోని లోపాలను కళ్లకు కట్టినట్లు చూపించే పాత్రల్లో ఆయన ప్రదర్శించిన భావోద్వేగాలు ప్రేక్షకుల హృదయాలలో నిలిచిపోయాయి. 

సంగీత దర్శకుడిగా, దర్శకుడిగా, నటుడిగా ఆర్పీ పట్నాయక్ తెరకెక్కించిన సంచలనాత్మక చిత్రం 'బ్రోకర్'లో గొల్లపూడి మారుతీరావు పోషించిన వృద్ధుడి పాత్ర తెలుగు సినిమా చరిత్రలోనే ఒక గొప్ప మైలురాయిగా నిలిచిపోతుంది. వృద్ధాప్యంలో కనీస అవసరాల కోసం, ప్రభుత్వం అందించే పింఛన్ కోసం ఒక సామాన్య పౌరుడు ప్రభుత్వ అధికారుల చుట్టూ తిరుగుతూ పడే వేదనను ఈ చిత్రంలోని ఒక చిన్న సన్నివేశం గొప్పగా ఆవిష్కరించింది.

ఆ సన్నివేశంలోకి వెళితే, ఒక వృద్ధుడు తన పింఛన్ మంజూరు కావడం కోసం బర్త్ సర్టిఫికేట్ పొందడానికి ఒక అధికారి దగ్గరకు వస్తాడు. అక్కడ సుమారు 30 నుండి 35 సంవత్సరాల వయసున్న అధికారి ఎదురుగా కూర్చొని ఉంటాడు. ఆ వృద్ధుడు "బాబు, నీకంటే ఒక 30 ఏళ్ల ముందు పుట్టాను కానీ, నేను పుట్టినట్టు నువ్వు సర్టిఫికేట్ ఇస్తే తప్ప ఆ అధికారులు నమ్మరట" అని అత్యంత దీనంగా వేడుకుంటాడు. దానికి అతను, మీ పుట్టిన తేదీ ఏమిటి అని ప్రశ్నించగా, ఆ వృద్ధుడు "ఆగస్టు 15, 1947" అని సమాధానమిస్తాడు. స్వాతంత్ర్యం వచ్చిన శుభదినాన పుట్టిన పౌరుడు, అర్ధ శతాబ్దం పైగా గడిచినా తన ఉనికిని నిరూపించుకోవడానికి కాగితాల కోసం అల్లాడటం సమాజంలోని వైపరీత్యాన్ని స్పష్టం చేస్తుంది.

అయితే ఆ అధికారం ఏమాత్రం సంకోచం లేకుండా "క్రీస్తు పూర్వం ఎప్పుడో పుట్టి ఇప్పుడు సర్టిఫికేట్ అంటే ఎలాగ. రూ. 1,000 మీది కాదనుకుని పారేస్తే అయోధ్య రాముడు, ఎలిజబెత్ టైలర్, మహాత్మా గాంధీ కూడా మన ఊర్లోనే పుట్టారని సర్టిఫికేట్ నేను తెచ్చి ఇస్తాను" అని చాలా తేలికగా వ్యాఖ్యానిస్తాడు. లంచం ఇస్తే అధికారుల ఎంక్వైరీ ఉండదా అని ఆ వృద్ధుడు అమాయకంగా అడిగితే, "ఎందుకు ఇచ్చారని ఎంక్వైరీ ఉండదు, ఎంత తీసుకుని ఇచ్చారనేది మాత్రమే చూస్తారు, ఎందుకంటే పై అధికారుల వరకు అందరికీ షేర్లు వెళ్తాయి. ఆ దేవుడికి కూడా లంచం ఇవ్వక తప్పదు బాబు" అంటూ సమాజంలో వేళ్లూనుకుపోయిన అవినీతి రూపాన్ని నగ్నంగా బయటపెడతాడు.

అధికారి నోటి వెంట వచ్చిన ఆ మాటలు విన్న ఆ వృద్ధుడి హృదయం ద్రవించిపోతుంది. కళ్లలో నీళ్లు తిరుగుతుండగా గొల్లపూడి మారుతీరావు గారు చెప్పిన సంభాషణలు ప్రతీ ఒక్కరి గుండెల్లో ఈటెలా గుచ్చుకుంటాయి. "అవును బాబు, మనది స్వతంత్ర భారతదేశం, నేను మర్చిపోయాను. 65 ఏళ్ల కిందటే ఈ స్వతంత్రాన్ని లంచాలకు తాకట్టు పెట్టామని మర్చిపోయాను. స్వాతంత్ర్యం వచ్చిన రోజే నేను పుట్టాను కానీ, నా పుట్టిన సర్టిఫికేట్ కోసం వెతుకుతున్నప్పుడు ఈ దేశానికి ఇంకా నిజమైన స్వాతంత్ర్యం రాలేదని ఇప్పుడు తెలుసుకున్నాను బాబు" అని నిట్టూరుస్తూ చెప్పే తీరు ప్రేక్షకులచేత కన్నీళ్లు పెట్టిస్తుంది.

ఆర్పీ పట్నాయక్ దర్శకత్వంలో వచ్చిన ఈ సీన్ సోషల్ మీడియాలో నేటికీ విపరీతంగా వైరల్ అవుతూ కోట్లాది మంది నెటిజన్ల మనస్సులను గెలుచుకుంటోంది. సమాజంలోని నిరుపేదల ఆవేదనను, కొందరు అధికారులు లంచం అడిగే నీచ సంస్కృతిని ఎండగట్టిన విధానం, గొల్లపూడి అద్భుతమైన నటన ఈ సన్నివేశాన్ని ఆల్ టైమ్ క్లాసిక్‌గా నిలిపాయి. 

 

 

Broker Movie, Heart Touching Scene, Gollapudi Maruti Rao, RP Patnaik