తెలుగు సినిమా చరిత్రలో హాస్యానికి సరికొత్త రూపునిచ్చిన మహానటుల్లో హాస్యకిరీటి రాజేంద్ర ప్రసాద్, వర్సటైల్ నటుడు చంద్రమోహన్ కాంబినేషన్ కు ఒక ప్రత్యేక స్థానం ఉంది. వీరిద్దరూ కలిసి నటించిన క్లాసిక్ కామెడీ ఎంటర్టైనర్ 'చిన్నోడు పెద్దోడు' ఆనాటి ప్రేక్షకులనే కాకుండా ఈనాటి తరాన్ని కూడా కడుపుబ్బ నవ్విస్తూనే ఉంది. ముఖ్యంగా ఈ చిత్రంలోని కొన్ని ఐకానిక్ కామెడీ సన్నివేశాలు సోషల్ మీడియాలో నిత్యం వైరల్ అవుతూ నెటిజన్లను విశేషంగా అలరిస్తున్నాయి.

ఈ వీడియో క్లిప్ లో ప్రధానాకర్షణగా నిలిచేది ఐకానిక్ హోటల్ కామెడీ సీన్. జేబులో చిల్లిగవ్వ కూడా లేకుండా హోటల్ లోకి అడుగుపెట్టిన చిన్నోడు, పెద్దోడు అక్కడున్న చికెన్, ఫిష్, ఆమ్లెట్ అంటూ రకరకాల మాంసాహార వంటకాలను కడుపునిండా లాగించేస్తారు. తీరా భోజనం పూర్తిచేసి బిల్లు కట్టే సమయం వచ్చేసరికి వీరిద్దరూ ఆడే నాటకం అసాధారణం. 'బిల్లు నేను కడతానంటే నేను కడతా' అని ఒకరినొకరు నెట్టుకుంటూ హోటల్ లోనే భారీ కొట్లాట మొదలుపెడతారు.

వారిద్దరి రచ్చతో హోటల్ లో ఉన్న సామగ్రి, పాత్రలు ధ్వంసమైపోతుంటే భయపడిపోయిన హోటల్ యజమాని చివరకు దండం పెట్టేస్తాడు. బిల్లు అడగడం దేవుడెరుగు, వారి చేతిలో చెరో యాభై రూపాయలు దక్షిణగా పెట్టి "ఇంకేమీ పగలగొట్టకుండా దయచేసి ఇక్కడి నుంచి వెళ్ళిపోండిరా నాయనా!" అని వేడుకునే ఘట్టం ప్రేక్షక లోకానికి నవ్వుల విందు పంచుతుంది. రాజేంద్ర ప్రసాద్ టైమింగ్, చంద్రమోహన్ ఎక్స్ ప్రెషన్స్ ఈ సీన్ కు ప్రాణం పోశాయి.

అలాగే దుస్తుల తయారీ ఫ్యాక్టరీలో వీరు చేసే హంగామా మరో ఎత్తు. ఒకే చెయ్యి ఉన్న చొక్కా, తలకాయ పట్టని టీషర్ట్ డిజైన్ చేస్తారు. ఆయన కోపంతో ఊగిపోతుంటే "మాలోని గొప్ప కళాకారులకు ఇక్కడ గుర్తింపు లేదు.. అదే అమెరికాలో ఐతే మాకు ఏకంగా బిరుదులు ఇచ్చేసేవారు" అంటూ చెప్పే కామిక్ డైలాగ్స్ ఇప్పటికీ విపరీతంగా పేలుతాయి.

ఇక తమ మేనమామ కూతురు కవిత ఊరి నుంచి ఇంటికి వస్తోందని తెలిసినప్పుడు ఆ ఇద్దరి అన్నదమ్ముల హడావుడి, ఆమెను ఆకట్టుకోవడానికి పడే తాపత్రయం అలరిస్తుంది. ఇంటి ముందున్న మురికి కాలువను బాగు చేయించడానికి అమ్మమ్మ దగ్గర డబ్బులు అడిగే ఘట్టం, దానికి ఆమె ఇచ్చే సమాధానాలు సినిమాలో వినోద స్థాయిని మరింత పెంచాయి.

దర్శకుడు రేలంగి నరసింహారావు మార్క్ వినోదం, నటుల అద్భుతమైన కామెడీ టైమింగ్ ఈ సినిమాను ఎవర్ గ్రీన్ క్లాసిక్ గా నిలబెట్టాయి. ఎన్నిసార్లు చూసినా బోర్ కొట్టని ఈ సన్నివేశాలు తెలుగు ప్రేక్షకులకు ఇప్పటికీ రిఫ్రెషింగ్ అనుభూతిని అందిస్తాయి.

ఎన్ని ఏళ్లు గడిచినా 'చిన్నోడు పెద్దోడు' చిత్రంలోని ఈ కామెడీ సీన్స్ చూస్తుంటే పెదవులపై నవ్వులు విరియడం ఖాయం. మీరు కూడా ఈ సరదా వీడియో క్లిప్ చూసి హాయిగా నవ్వుకోండి.

 

Chinnodu Peddodu Movie, Comedy Scenes, Rajendra Prasad, Chandra Mohan, Telugu Comedy