బ్లాక్ బస్టర్ హిట్స్ కి సరికొత్త అర్ధం చెప్తున్న అనిల్ రావిపూడి మరోసారి బాక్సాఫీస్‌పై తన హవా చాటడానికి  సిద్ధమయ్యారు. విక్టరీ వెంకటేష్, నందమూరి కళ్యాణ్ రామ్ కలయికలో తెరకెక్కుతున్న భారీ క్రేజీ మల్టీస్టారర్ ప్రాజెక్ట్ #VenkyAnil5 / #NkrAR2 అధికారికంగా సెట్స్ పైకి వెళ్లిపోయింది. ప్రేక్షకులకి  వంద శాతం వినోదాన్ని పంచడమే లక్ష్యంగా, సరికొత్త కాంబినేషన్‌తో అనిల్ రావిపూడి ప్లాన్ చేసిన ఈ చిత్రం ప్రస్తుతం ఫిల్మ్ నగర్ వర్గాల్లో హాట్ టాపిక్‌గా మారింది.

 జులై 2 నుండి ఒక భారీ కొత్త షెడ్యూల్‌తో హైదరాబాద్‌లోని లతా హౌస్‌లో శరవేగంగా  షూటింగ్ ప్రారంభమైంది. ఈ తాజా షెడ్యూల్‌లో విక్టరీ వెంకటేష్ కూడా సెట్స్‌లోకి అడుగుపెట్టారు. ఎలాంటి విరామాలు లేకుండా, నాన్‌స్టాప్‌గా షూటింగ్ పూర్తి చేసి, వచ్చే అక్టోబర్ లేదా నవంబర్ నాటికి మొత్తం టాకీ పార్ట్‌  క్లియర్ చేయాలనేది దర్శకుడి ప్లాన్.

ఇక ఇటీవల విడుదలైన ఈ సినిమా లాంచ్ ప్రొమో ‘కత్తి లాంటి ఐడియా’ సోషల్ మీడియాలో విపరీతంగా ట్రెండ్ అవుతోంది. దర్శకుడు అనిల్ రావిపూడి కాన్సెప్ట్ డిస్కషన్స్ సమయంలో అసహనానికి గురికావడం, దానికి వెంకటేష్ తనదైన స్టైల్లో స్పందిస్తూ చేతిని కోసుకుని నెరటిపై రక్తాన్ని ‘విజయ తిలకం’గా దిద్దే సీన్ ప్రేక్షకులని  విపరీతంగా నవ్విస్తోంది. ఈ సరదా ప్రొమోలో నందమూరి కళ్యాణ్ రామ్, కీర్తి సురేష్, కృతి శెట్టి మరియు సంగీత దర్శకుడు జి.వి. ప్రకాష్ కుమార్ కూడా భాగస్వామ్యమై సినిమాపై అంచనాలను ఒక్కసారిగా పెంచేశారు.

ఈ చిత్రంలో విక్టరీ వెంకటేష్ సరసన మహానటి కీర్తి సురేష్ నటిస్తుండగా, కళ్యాణ్ రామ్ జోడీగా టాలీవుడ్ బేబమ్మ కృతి శెట్టి నటిస్తోంది. షైన్ స్క్రీన్స్ బ్యానర్‌పై సాహు గారపాటి ఈ భారీ ప్రాజెక్ట్‌ను నిర్మిస్తుండగా, సురేష్ ప్రొడక్షన్స్ మరియు జీ స్టూడియోస్ సంయుక్తంగా సమర్పిస్తున్నాయి. ఈ చిత్రానికి టాలెంటెడ్ కంపోజర్ జి.వి. ప్రకాష్ కుమార్ స్వరాలు సమకూరుస్తుండగా, సమీర్ రెడ్డి కెమెరా బాధ్యతలను నిర్వహిస్తున్నారు. అవుట్ అండ్ అవుట్ హిలేరియస్ ఫ్యామిలీ ఎంటర్టైనర్‌గా తెరకెక్కుతున్న ఈ చిత్రాన్ని సంక్రాంతి 2027 కానుకగా థియేటర్లలోకి తీసుకురావడానికి మేకర్స్ సన్నాహాలు చేస్తున్నారు.