ఘట్టమనేని వారసత్వాన్ని అందిపుచ్చుకుంటూ సూపర్ స్టార్ కృష్ణ మనవడు, రమేష్ బాబు కుమారుడు జయకృష్ణ (Jaya Krishna Ghattamaneni) వెండితెరకు పరిచయమవుతున్న సంగతి తెలిసిందే. ఆయన హీరోగా నటిస్తున్న 'శ్రీనివాస మంగాపురం' (Srinivasa Mangapuram) సినిమాపై ఇండస్ట్రీలోనూ, ప్రేక్షకుల్లోనూ మంచి అంచనాలు ఉన్నాయి. తాజాగా ఈ సినిమాను చూసిన ప్రముఖ నిర్మాత ఘట్టమనేని ఆదిశేషగిరిరావు (Adiseshagiri Rao) చిత్ర యూనిట్‌పై ప్రశంసల జల్లు కురిపించారు. జయకృష్ణ నటన, సినిమా అవుట్‌పుట్ చూసి తాను ఆశ్చర్యపోయానని ఆయన పేర్కొన్నారు.

హీరోగా జయకృష్ణ అదరగొట్టాడు
తాజాగా తెలుగువన్ కి ఇచ్చిన ఇంటర్వ్యూలో ఆదిశేషగిరిరావు మాట్లాడుతూ.. జయకృష్ణ స్క్రీన్ ప్రెజెన్స్, నటన అద్భుతంగా ఉన్నాయని కొనియాడారు. సెంటిమెంట్ సీన్స్, కోపంతో కూడిన హావభావాలు, డైలాగ్ డెలివరీ.. ఇలా ప్రతి విషయంలోనూ ఎక్కడా తొలి సినిమా అనే భావన కలగకుండా ఎంతో పరిణతితో నటించాడని అభినందించారు. జయకృష్ణలో కృష్ణ గారి పోలికలు, రమేష్ బాబు మరియు మహేష్ బాబుల మాస్ అండ్ క్లాస్ లుక్స్ అన్నీ మేళవించి కనిపిస్తున్నాయని, అతను సరికొత్తగా తన సొంత ముద్ర వేసుకున్నాడని స్పష్టం చేశారు. పెద్ద లెగసీని వెనకుంచుకుని రావడం కత్తిమీద సామే అయినా, జయకృష్ణ దాన్ని చాలా సులువుగా డీల్ చేశాడని మెచ్చుకున్నారు.

కృష్ణ గారి కోరిక నెరవేరింది
జయకృష్ణను హీరోగా పరిచయం చేయడం వెనుక ఉన్న ఆసక్తికరమైన విషయాలను కూడా ఆదిశేషగిరిరావు పంచుకున్నారు. సూపర్ స్టార్ కృష్ణ గారు బ్రతికున్నప్పుడే మనవడి లాంచ్ గురించి చర్చలు జరిగాయని, ప్రముఖ నిర్మాత అశ్వినీదత్ చేతుల మీదుగా ఫస్ట్ పిక్చర్ ఉంటే బాగుంటుందని కృష్ణ గారు క్యాజువల్ గా కోరారని గుర్తుచేసుకున్నారు. కేవలం నటన మాత్రమే కాకుండా, సినిమా రంగంలో మెళకువలు తెలుసుకోవడానికి డైరెక్షన్ కోర్సు కూడా నేర్చుకోవాలని జయకృష్ణకు తాము సలహా ఇచ్చామని తెలిపారు. కృష్ణ గారు అనుకున్న సెంటిమెంట్ ప్రకారమే ఈ ప్రాజెక్ట్ పట్టాలెక్కింది.

అజయ్ భూపతి టేకింగ్.. జీవీ ప్రకాష్ మ్యూజిక్ హైలైట్
ఈ చిత్రానికి అజయ్ భూపతి దర్శకత్వం వహిస్తుండగా, ప్రముఖ సంగీత దర్శకుడు జీవీ ప్రకాష్ కుమార్ అద్భుతమైన స్వరాలు అందించారని ఆదిశేషగిరిరావు చెప్పారు. సినిమాలో మొత్తం ఆరు పాటలు ఉన్నాయని, ప్రతి ఒక్కటి చాలా బాగుందని పేర్కొన్నారు. ఇదొక పక్కా మ్యూజికల్ హిట్ అవుతుందని ధీమా వ్యక్తం చేశారు. నిర్మాత అశ్వినీదత్ గారు ప్రొడక్షన్ వాల్యూస్ ఎక్కడా తగ్గకుండా, స్క్రీన్ మీద ప్రతి పైసా కనిపించేలా ఖర్చు పెట్టారని, వేస్టేజ్ లేకుండా సినిమాను చాలా రిచ్‌గా నిర్మించారని కొనియాడారు. టెక్నీషియన్స్ అందరూ బెస్ట్ అవుట్‌పుట్ ఇచ్చారని, ఈ 'శ్రీనివాస మంగాపురం' థియేటర్లలో ప్రేక్షకులను ఎంతగానో అలరిస్తుందనే నమ్మకాన్ని వ్యక్తం చేశారు.