టాలీవుడ్ యంగ్ అండ్ ప్రామిసింగ్ హీరో సందీప్ కిషన్ సరికొత్త వినోదంతో ఓటీటీ ఆడియన్స్ ముందుకు వచ్చారు. నెట్‌ఫ్లిక్స్ నిర్మించిన మొట్టమొదటి ఒరిజినల్ తెలుగు వెబ్ సిరీస్ 'సూపర్ సుబ్బు' జూలై 2 నుంచి డిజిటల్ స్క్రీన్స్ పై సందడి చేస్తోంది. 'డీజే టిల్లు' లాంటి బ్లాక్‌బస్టర్ సినిమాను అందించిన దర్శకుడు మల్లిక్ రామ్ ఈ సిరీస్‌ను తెరకెక్కించారు. ఒక విలక్షణమైన అడల్ట్ ఎడ్యుకేషన్ థీమ్‌ను ఎంచుకుని, దానికి క్లీన్ కామెడీ మరియు హృదయాన్ని హత్తుకునే భావోద్వేగాలను జోడించి ఈ సిరీస్‌ను మలిచారు. చిలకా ప్రొడక్షన్స్ బ్యానర్‌పై రాజీవ్ చిలక, భరత్ లక్ష్మీపతి అత్యంత ప్రతిష్టాత్మకంగా ఈ ప్రాజెక్ట్‌ను నిర్మించారు.

ఈ కథ అంతా సుబ్రహ్మణ్యం చిల్లుకూరిరావు అలియాస్ సుబ్బు అనే ఒక అమాయక, నిజాయితీ గల యువకుడి చుట్టూ తిరుగుతుంది. తన తండ్రి కుకటేశ్వరరావు (మురళీ శర్మ) ముందు ఎలాగైనా మంచి పేరు తెచ్చుకోవాలని సుబ్బు తపన పడుతుంటాడు. ఈ క్రమంలోనే అతనికి ఎవరూ వెళ్లడానికి ఇష్టపడని 'మాకీపూర్' అనే ఒక సాంప్రదాయ, వింత గ్రామంలో 'ప్రజా అవగాహన అధికారి' (పబ్లిక్ అవేర్నెస్ ఆఫీసర్)గా ఉద్యోగం వస్తుంది. ఆ ఊరి ప్రజలకు కనీస విషయాలపై సరైన అవగాహన లేకపోవడంతో, సుబ్బు అక్కడ అడల్ట్ ఎడ్యుకేషన్ మాస్టర్‌గా మారి పాఠాలు చెప్పాల్సి వస్తుంది. అయితే అతను అనుకున్నంత సులభంగా ఆ గ్రామంలో ఏదీ సాగదు. ఒక సమస్యను పరిష్కరించాలని సుబ్బు ప్రయత్నిస్తే, అతని చుట్టూ మరో ఐదు కొత్త సమస్యలు వచ్చి పడుతుంటాయి. ఆ ఊరి జనం అపార్థాలు, పుకార్ల మధ్య సుబ్బు లైఫ్ ఎలాంటి గందరగోళంలో పడింది, చివరికి అతను తన లక్ష్యాన్ని ఎలా నెరవేర్చాడు అనేదే ఈ సిరీస్ ముఖ్య కథాంశం.

ఈ సిరీస్‌లో బాలీవుడ్ ఫేమస్ వెబ్ సిరీస్ లిటిల్ థింగ్స్‌తో  గుర్తింపు పొందిన మిథిలా పాల్కర్ హీరోయిన్‌గా నటించింది. ఆమె ఇందులో ఒక క్రేజీ సోషల్ మీడియా ఇన్‌ఫ్లుయెన్సర్‌గా, ఎలాగైనా నటి కావాలని కలలుకనే పాత్రలో మెరిసింది. ఆమె గ్లామర్, యాక్టింగ్ సిరీస్‌కు అదనపు ఆకర్షణగా నిలిచాయి. ఇక సుబ్బు పాత్రలో సందీప్ కిషన్ ఒదిగిపోయారు. అమాయకత్వం, బాధ్యత, కన్ఫ్యూజన్ వంటి వేరియేషన్స్ ఉన్న ఎమోషన్స్ ను ఆయన చాలా అద్భుతంగా పండించారు. వీరికి తోడుగా టాలీవుడ్ కామెడీ కింగ్ బ్రహ్మానందం, మురళీ శర్మ, బర్నింగ్ స్టార్ సంపూర్ణేష్ బాబు, గెటప్ శ్రీను, జీవన్, మానస చౌదరి తమ నటనతో సిరీస్‌ను నెక్స్ట్ లెవెల్‌కు తీసుకెళ్లారు. ముఖ్యంగా బ్రహ్మానందం, గెటప్ శ్రీను, సంపూర్ణేష్ బాబుల కామెడీ ట్రాక్స్ ప్రేక్షకులకు మంచి వినోదాన్ని అందిస్తాయి.

సాధారణంగా సమాజంలో చర్చించడానికి సంకోచించే అడల్ట్ ఎడ్యుకేషన్ అనే కాన్సెప్ట్‌ను ఎక్కడా అశ్లీలత లేకుండా, ఫుల్ లెంగ్త్‌ హ్యూమర్ అండ్ విలేజ్ బ్యాక్‌డ్రాప్ ఎమోషన్స్‌తో డైరెక్టర్ మల్లిక్ రామ్ ఆవిష్కరించిన విధానం ప్రశంసనీయం. గ్రామస్థుల అమాయకత్వం చుట్టూ నడిచే సన్నివేశాలు నవ్వులు పూయిస్తూనే, సమాజంలోని కొన్ని చేదు వాస్తవాలను ఆలోచింపజేసేలా చేస్తాయి. నెట్‌ఫ్లిక్స్ లో అడుగుపెట్టిన ఈ ఫస్ట్ తెలుగు ఒరిజినల్ సిరీస్ వీకెండ్‌లో ఫ్యామిలీతో కలిసి హాయిగా నవ్వుకోవడానికి ఒక పక్కా ఫీల్ గుడ్ ఎంటర్‌టైనర్‌గా నిలుస్తుంది.

రేటింగ్: 2.5/5

 

 

 

Super Subbu Review, Sundeep Kishan Super Subbu, Netflix First Telugu Series, Super Subbu OTT Release, Mallik Ram Director, Mithila Palkar Telugu Series