టాలీవుడ్ లో ప్రస్తుతం ఒక ప్రత్యేకమైన సమస్య దర్శకులను, నిర్మాతలను తెగ వేధిస్తోంది. కమర్షియల్ సినిమాల్లో మాస్ ఆడియన్స్‌ను థియేటర్ల వైపు తిప్పుకోవడానికి అత్యంత కీలకమైన 'ఐటమ్ సాంగ్' కోసం సరైన భామలను ఎంపిక చేయడం ఇప్పుడు పెద్ద టాస్క్‌గా మారిపోయింది. మొన్నటికి మొన్న 'పెద్ది' సినిమా కోసం ఎంతో మంది స్టార్ హీరోయిన్ల ఆప్షన్లను పరిశీలించి, చివరికి శృతి హాసన్ దగ్గర సెటిల్ అయిన సంగతి అందరికీ తెలిసిందే. 

భారీ రెమ్యూనరేషన్ ఆఫర్ చేస్తున్నప్పటికీ చాలా మంది స్టార్ హీరోయిన్లు ప్రత్యేక గీతాల్లో నటించడానికి అసలు ఆసక్తి చూపించడం లేదు. ఒకవేళ కొంతమంది అంగీకరించినా, వారి కాల్ షీట్లు సమయానికి అడ్జస్ట్ కావడం లేదు. ఇక రెగ్యులర్‌గా స్పెషల్ సాంగ్స్ చేసే పూజా హెగ్డే, తమన్నా వంటి ముద్దుగుమ్మలు ప్రేక్షకులకు రొటీన్ అయిపోయారు. ప్రజెంట్ క్రేజ్ ఉన్న వాళ్లు అంత సులువుగా ఒప్పుకోకపోవడంతో ఈ వెతుకులాట నిరంతరం సాగుతూనే ఉంది.

ప్రస్తుతం ఇదే తరహా టెన్షన్ నేచురల్ స్టార్ నాని (Nani) నటిస్తున్న లేటెస్ట్ క్రేజీ ప్రాజెక్ట్ 'ప్యారడైజ్' (The Paradise) టీమ్‌లో కూడా నెలకొంది. నాని, 'దసరా' ఫేమ్ దర్శకుడు శ్రీకాంత్ ఓదెల, ఎస్‌ఎల్‌వి సినిమాస్ అధినేత సుధాకర్ చెరుకూరి కాంబినేషన్‌లో వస్తున్న 'ప్యారడైజ్' మూవీపై భారీ అంచనాలు ఉన్నాయి. అయితే, ఈ సినిమా షూటింగ్ పనులు ఇప్పటికే చాలా ఆలస్యమయ్యాయి. దీంతో ఏమాత్రం గ్యాప్ తీసుకోకుండా సినిమాను చకచకా ఫినిష్ చేసే పనిలో పడింది చిత్ర యూనిట్. ఎలాగైనా సరే ఈ జూలై నెలాఖరు నాటికి పూర్తి షూటింగ్‌ను ముగించాలని మేకర్స్ గట్టి పట్టుదలతో ఉన్నారు. ప్రస్తుతం ఈ సినిమాకు సంబంధించి కేవలం క్లైమాక్స్ పార్ట్, ఒక భారీ ఐటమ్ సాంగ్ షూట్ మాత్రమే బ్యాలెన్స్ ఉన్నట్లు తెలుస్తోంది. ఇవి రెండూ కంప్లీట్ అయితే సినిమా టాకీ పార్ట్ మొత్తం పూర్తయినట్లే.

ఒకవైపు సెట్స్‌పై మిగిలిన షూటింగ్‌ను వేగంగా జరుపుతూనే, మరోవైపు పారలల్‌గా పోస్ట్ ప్రొడక్షన్ పనులను కూడా చిత్ర బృందం శరవేగంగా పర్యవేక్షిస్తోంది. అయితే, వీటన్నింటికంటే మూవీ టీమ్‌కు ఇప్పుడు పెద్ద తలనొప్పిగా మారింది ఆ స్పెషల్ ఐటమ్ సాంగ్ కు ఎవరిని ఎంపిక చేయాలనే విషయమే. టాలీవుడ్, కోలీవుడ్, బాలీవుడ్‌కు చెందిన పలువురు స్టార్ హీరోయిన్ల పేర్లను పరిశీలిస్తున్నప్పటికీ, డేట్ల సర్దుబాటు కాకపోవడంతో మేకర్స్ తలపట్టుకుంటున్నారు. అసలు ఈ క్రేజీ మాస్ మసాలా సాంగ్ కోసం సరికొత్త ముఖాన్ని పరిచయం చేస్తే బాగుంటుందేమో అనే ప్రత్యామ్నాయ ఆలోచన కూడా దర్శకుడు శ్రీకాంత్ ఓదెల చేస్తున్నట్లు ఇన్ సైడ్ టాక్. కొత్త అమ్మాయి అయితే ఫ్రెష్ లుక్ రావడంతో పాటు డేట్స్ సమస్య కూడా ఉండదని భావిస్తున్నారు.

అయితే ఇక్కడ అసలైన హైలైట్ ఏంటంటే, ఈ ఐటమ్ సాంగ్ కోసం రాకింగ్ మ్యూజిక్ డైరెక్టర్ అనిరుధ్ రవిచందర్ ఎలాంటి ట్యూన్ ఇస్తారనేది. అనిరుధ్ ఇచ్చే ఊరమాస్ బీట్స్‌కు థియేటర్లు దద్దరిల్లడం ఖాయం కాబట్టి, ఆ రేంజ్ ఎనర్జీని మ్యాచ్ చేసే గ్లామరస్ బ్యూటీ కోసం ప్యారడైజ్ టీమ్ వేట కొనసాగిస్తోంది. మరి ఈ నెలాఖరు లోపు ఈ ఐటమ్ బాంబ్ దొరుకుతుందో లేదో, నాని పక్కన స్టెప్పులేసే ఆ లక్కీ ఛాన్స్ ఎవరిని వరిస్తుందో చూడాలి.

 

The Paradise, Item Song, Nani, Srikanth Odela