సినిమా ఇండస్ట్రీలోకి అడుగుపెట్టాలనే కలతో ఎంతో మంది తమ ఉద్యోగాలను, కెరీర్‌ను సైతం వదిలేసిన సందర్భాలు ఉన్నాయి. అలాంటి వారిలో టాలీవుడ్ హీరోయిన్ రాశి సింగ్ కూడా ఒకరు. ఛత్తీస్‌గఢ్‌లోని భిలాయ్‌కు చెందిన రాశి సింగ్‌కు చిన్నప్పటి నుంచే నటనపై ఆసక్తి ఉండేది. 14 ఏళ్ల వయసులోనే మోడలింగ్, కమర్షియల్ యాడ్స్‌లో కనిపించిన ఆమె.. ఆ తర్వాత కొంతకాలం ఎయిర్‌హోస్టెస్‌గా పనిచేశారు. అయితే సినిమాల్లో నటించాలన్న కోరిక మాత్రం ఆమెను వెంటాడుతూనే ఉండేది.

ఎయిర్‌లైన్స్‌లో ఉద్యోగం చేస్తున్న సమయంలోనే సినిమాల్లో తన అదృష్టాన్ని పరీక్షించుకోవాలని నిర్ణయించుకున్నారు రాశి. ఇందుకోసం హైదరాబాద్‌కు మకాం మార్చారు. మోడలింగ్, యాడ్స్ ద్వారా కెమెరా ముందు అనుభవాన్ని సంపాదించుకున్న ఆమె.. పలువురు దర్శకులను కలుస్తూ ఆడిషన్స్‌కు హాజరయ్యారు. చివరికి 2021లో ఆది సాయికుమార్ హీరోగా నటించిన ‘శశి’ సినిమాతో హీరోయిన్‌గా టాలీవుడ్‌లోకి ఎంట్రీ ఇచ్చారు. ఆ తర్వాత ‘ప్రేమ్ కుమార్’, ‘భూతద్దం భాస్కర్ నారాయణ’, ‘ప్రసన్న వదనం’ వంటి సినిమాల్లో విభిన్న పాత్రలు పోషించారు.

అయితే రాశి ప్రయాణం అంత సులభంగా సాగలేదు. సినిమా అవకాశాల కోసం ప్రయత్నిస్తున్న సమయంలో ఓవైపు ఉద్యోగం, మరోవైపు తన నటన కలను కొనసాగించారు. అధికారికంగా యాక్టింగ్ కోర్సు చేయలేకపోయినా మోడలింగ్, యాడ్ షూటింగ్స్‌నే నటనకు శిక్షణగా మలుచుకున్నారు. తెలుగు కూడా మొదట్లో ఆమెకు కొత్తే అయినప్పటికీ షూటింగ్స్‌లో దర్శకులు, చిత్రబృందం సహకారంతో నేర్చుకున్నారు. చిన్న పట్టణం నుంచి వచ్చిన తనకు సినిమాల్లోకి రావడం అంత సులభం కాదని, అయినా పట్టుదలతో ముందుకెళ్లానని గతంలో రాశి చెప్పుకొచ్చారు.

ఇక రాశి సింగ్ ప్రస్తుతం సినిమాలతో పాటు వ్యాపార రంగంలోనూ అడుగుపెట్టారు. 2026లో ఇచ్చిన ఓ ఇంటర్వ్యూలో తనకు రెస్టారెంట్, కేఫ్ బిజినెస్ కూడా ఉందని ఆమె వెల్లడించారు. సినిమాల్లో మరిన్ని విభిన్నమైన, ఛాలెంజింగ్ పాత్రలు చేయాలన్నదే తన లక్ష్యమని చెబుతున్నారు. ఇలా ఎయిర్‌హోస్టెస్‌గా కెరీర్ ప్రారంభించి, తన చిన్ననాటి కలను నెరవేర్చుకునేందుకు సినీ రంగంలోకి వచ్చిన రాశి సింగ్ జర్నీ ఆసక్తికరంగా మారింది.

 

 

[Rashi Singh, Rashi Singh Actress, Rashi Singh Air Hostess, Rashi Singh Cinema Journey, Rashi Singh Movies, Rashi Singh Biography, Telugu Actress Rashi Singh, Tollywood Actress, Rashi Singh Sashi, Rashi Singh Prasanna Vadanam]