విజయ్ దేవరకొండ హీరోగా, రష్మిక మందన్న హీరోయిన్‌గా నటిస్తున్న పీరియాడికల్ యాక్షన్ డ్రామా ‘రణబాలి’. ‘టాక్సీవాలా’ తర్వాత విజయ్ దేవరకొండ, దర్శకుడు రాహుల్ సంకృత్యాన్ కాంబినేషన్‌లో వస్తున్న ఈ సినిమాపై ఇప్పటికే భారీ అంచనాలు ఉన్నాయి. 19వ శతాబ్దపు బ్రిటిష్ పాలన నేపథ్యంలో సాగే ఈ చిత్రాన్ని 1854–1878 మధ్య జరిగిన వాస్తవ చారిత్రక సంఘటనల ఆధారంగా తెరకెక్కిస్తున్నట్లు చిత్రబృందం చెబుతోంది. ఈ నేపథ్యంలో సినిమాకు సంబంధించిన ఆసక్తికర విషయాలను దర్శకుడు రాహుల్ పంచుకుంటున్నారు. తాజాగా ‘రణబాలి’ పాత్రను తీర్చిదిద్దడం వెనుక ఉన్న స్ఫూర్తి గురించి ఆయన ఆసక్తికర విషయాలు వెల్లడించారు.

సినిమాలో విజయ్ దేవరకొండ సింగనమల బొబ్బిలి రణబాలి అనే యోధుడి పాత్రలో కనిపించనున్నారు. బ్రిటిషర్లకు వ్యతిరేకంగా పోరాడిన రాయలసీమ ప్రాంతానికి చెందిన వీరుడిగా ఈ పాత్రను చూపించబోతున్నారు. అయితే రణబాలి పాత్రను ఒకే వ్యక్తి జీవిత కథ ఆధారంగా రూపొందించలేదని, ముగ్గురు రాయలసీమ వీరుల స్ఫూర్తిని తీసుకుని పాత్రను తీర్చిదిద్దినట్లు దర్శకుడు రాహుల్ వెల్లడించినట్లు సమాచారం. దీంతో విజయ్ పోషిస్తున్న ఈ పాత్రలో చారిత్రక నేపథ్యంతో పాటు కల్పిత అంశాలు కూడా మిళితమై ఉండనున్నట్లు తెలుస్తోంది.

ఇక రష్మిక మందన్న ఈ సినిమాలో జయమ్మ పాత్రలో కనిపించనున్నారు. ఈ పాత్రకు తన తల్లి పేరు పెట్టినట్లు గతంలో దర్శకుడు రాహుల్ తెలిపారు. 19వ శతాబ్దానికి చెందిన మహిళగా జయమ్మ పాత్రను రూపొందించినప్పటికీ.. నేటి మహిళలకు స్ఫూర్తినిచ్చేలా ఆమె క్యారెక్టర్‌ను తీర్చిదిద్దినట్లు చెప్పారు. విజయ్, రష్మిక జంటగా ‘గీత గోవిందం’, ‘డియర్ కామ్రేడ్’ తర్వాత కలిసి నటిస్తున్న మూడో సినిమా ఇదే కావడం మరో ప్రత్యేకత.

మైత్రీ మూవీ మేకర్స్ పతాకంపై నవీన్ యెర్నేని, వై. రవిశంకర్ ఈ సినిమాను భారీ స్థాయిలో నిర్మిస్తున్నారు. ‘ది మమ్మీ’ ఫేమ్ ఆర్నాల్డ్ వోస్లూ ఇందులో విలన్‌గా కనిపించనుండగా.. పీరియాడికల్ బ్యాక్‌డ్రాప్, యాక్షన్ సన్నివేశాలతో సినిమాను తెరకెక్కిస్తున్నారు. ముందుగా ప్రకటించిన షెడ్యూల్ ప్రకారం ‘రణబాలి’ అక్టోబర్ 16న దసరా కానుకగా ప్రపంచవ్యాప్తంగా థియేటర్లలోకి రానుంది. ఇప్పుడు రణబాలి పాత్ర వెనుక ఉన్న ఈ ముగ్గురు రాయలసీమ వీరులు ఎవరు? వారిని దర్శకుడు ఎలా సినిమాలోకి తీసుకొచ్చారు? అనే విషయాలు ప్రేక్షకుల్లో మరింత ఆసక్తిని పెంచుతున్నాయి.

 

 

[Ranabaali, Ranabaali Movie, Vijay Deverakonda Ranabaali, Rahul Sankrityan, Ranabaali Character, Rayalaseema Warriors, Vijay Deverakonda New Movie, Rashmika Mandanna Ranabaali, Ranabaali Release Date, Ranabaali Movie Updates]