అన్నపూర్ణ స్టూడియోస్, ఎపిక్ స్టూడియోస్ సంయుక్తంగా నిర్మించిన డిఫరెంట్ అండ్ హార్ట్ టచింగ్ రూరల్ డ్రామా 'పళ్లబురుసు' ఈరోజే గ్రాండ్‌గా థియేటర్లలోకి వచ్చింది. 'బలగం' ఫేమ్ సుధాకర్ రెడ్డి, మురళీధర్ గౌడ్ ప్రధాన పాత్రల్లో నటించగా, ఉదయ్ చౌహాన్ ఈ చిత్రంతో దర్శకుడిగా పరిచయమయ్యారు. ఫస్ట్ డే ఫస్ట్ షోలు పూర్తయ్యేసరికి సోషల్ మీడియాలో, ముఖ్యంగా ట్విట్టర్ (X) లో ఈ సినిమా టాక్ ఏంటి? ఒక చిన్న పళ్లబురుసు చుట్టూ అల్లుకున్న ఈ తెలంగాణ నేటివిటీ డ్రామా ప్రేక్షకులను ఏ రేంజ్‌లో మెప్పించింది?

సినిమా కథలోకి వెళ్తే.. తెలంగాణ గ్రామీణ నేపథ్యంలో సాగే ఒక 68 ఏళ్ల ముసలాయన (సుధాకర్ రెడ్డి), తన కొడుకుతో (మురళీధర్ గౌడ్) ఉన్న విభేదాల వల్ల దూరంగా ఉంటాడు. ఆయనకు ఒక చిన్న టూత్‌బ్రష్ (పళ్లబురుసు) కావాలనే కోరిక ఉంటుంది. కానీ ఆ చిన్న విషయమే పెద్దదై, చివరికి తన కొడుకుపైనే కోర్టులో కేస్ వేసే వరకు వెళ్తుంది. అసలు ఒక పళ్లబురుసు కోసం కొడుకుపై కేస్ ఎందుకు వేయాల్సి వచ్చింది? ఆ చిన్న కోరిక వెనుక ఉన్న ఆత్మాభిమానం, ప్రేమ, ఆవేదన ఏంటి? అనేది ఈ సినిమా ముఖ్య కథాంశం.

ట్విట్టర్‌లో మొదటి షోలు చూసిన ఆడియన్స్ చెబుతున్న మాట ఏంటంటే.. "ఇదొక బ్యూటిఫుల్, హార్ట్‌వార్మింగ్ అండ్ ఎమోషనల్ డ్రామెడీ". సినిమా ప్రారంభంలోనే తెలంగాణ గ్రామీణ వాతావరణం, అక్కడి మనుషుల సహజమైన యాస, పాత్రల పరిచయంతో మనల్ని ఆ కథలోకి తీసుకెళ్తారు.

నటన విషయానికి వస్తే.. 'బలగం' ఫేమ్ సుధాకర్ రెడ్డి, మురళీధర్ గౌడ్ ల పర్‌ఫార్మెన్స్ సినిమాకి అతిపెద్ద పిల్లర్. తండ్రీ కొడుకులుగా వీరిద్దరి మధ్య వచ్చే ఈగోలు, చిన్న చిన్న గొడవలు, కామెడీ సీన్లు థియేటర్లలో నవ్వులు పూయిస్తే.. సెకండ్ హాఫ్‌కి వచ్చేసరికి అదే కాంబినేషన్ కంటతడి పెట్టిస్తుంది. మనుషుల మధ్య తగ్గుతున్న అనుబంధాలు, వృద్ధాప్యంలో తల్లిదండ్రులు ఎదుర్కొనే ఒంటరితనాన్ని దర్శకుడు ఉదయ్ చౌహాన్ చాలా హుందాగా, ఎక్కడా డ్రామా ఎక్కువ కాకుండా సహజంగా తెరకెక్కించారని నెటిజన్లు ప్రశంసిస్తున్నారు.

ఇక ఇతర పాత్రల్లో నటించిన ప్రజ్వల్ యాద్మ, గోమతి రెడ్డి, చంద్రవ్వ తమ పరిధి మేర బెస్ట్ అవుట్‌పుట్ ఇచ్చారు. సాంకేతికంగా చూస్తే.. 'లవ్ స్టోరీ' ఫేమ్ పవన్ సీహెచ్ అందించిన బ్యాక్‌గ్రౌండ్ మ్యూజిక్ గ్రామీణ ఎమోషన్స్‌ను నెక్స్ట్ లెవల్‌కి తీసుకెళ్లింది. వినోద్ కె. బంగారి సినిమాటోగ్రఫీ ఊరి వాతావరణాన్ని చాలా కలర్‌ఫుల్‌గా, నాచురల్‌గా క్యాప్చర్ చేసింది.

నాగార్జున ప్రీ-రిలీజ్ ఈవెంట్‌లో చెప్పినట్లే.. 'పళ్లబురుసు' కేవలం ఒక కామెడీ సినిమా కాదు, ప్రతి ఇంట్లో ఉండే తండ్రీ కొడుకుల కథ. కోర్టు రూమ్ డ్రామా సీన్స్, క్లైమాక్స్ ఎపిసోడ్స్ ఆడియన్స్‌కి ఒక మంచి అనుభూతిని ఇస్తాయి. ట్విట్టర్ టాక్ ప్రకారం.. క్లీన్ అండ్ ఎమోషనల్ రూరల్ డ్రామాలను ఇష్టపడేవారికి ఈ సినిమా పర్ఫెక్ట్ ఛాయిస్.

 

 

 

Pallaburusu Review, Sudhakar Reddy, Muralidhar Goud, Uday Chauhan, Annapurna Studios