నాలాగే శర్వాకు కూడా అమ్మ అంటే ప్రాణం!
on Sep 13, 2022
అమల అక్కినేని, శర్వానంద్ తల్లీకొడుకులుగా నటించిన 'ఒకే ఒక జీవితం' సెప్టెంబర్ 9న విడుదలై ఇటు విమర్శకుల ప్రశంసలను అందుకోవడంతో పాటు, అటు ప్రేక్షకుల ఆదరణనూ పొందుతోంది. ఈ మూవీతో శ్రీకార్తీక్ దర్శకునిగా పరిచయమయ్యాడు. డ్రీమ్ వారియర్ పిక్చర్స్ బ్యానర్పై ఎస్.ఆర్. ప్రకాశ్బాబు, ఎస్.ఆర్. ప్రభు ఈ చిత్రాన్ని నిర్మించారు. తొలి సినిమా విజయానందాన్ని అనుభవిస్తోన్ శ్రీకార్తీక్ జర్నలిస్టులతో పంచుకున్న విషయాలు ఆయన మాటల్లోనే...
"ఈ కథని రాయడానికి రెండేళ్ళు పట్టింది. సరైన హీరో కుదరడానికి మరో ఏడాదిన్నర పట్టింది. తర్వాత కోవిడ్ వలన రెండేళ్ళు.. సినిమా ప్రేక్షకుల ముందుకు రావడానికి దాదాపు ఐదేళ్ళు పట్టింది. అయితే నా నిరీక్షణకి తగిన ఫలితం దక్కింది. సినిమా అందరికీ కనెక్ట్ అయ్యింది. ఒక బరువు దిగిన భావన కలుగుతోంది. చాలా ఆనందంగా వుంది."
ఈ కథకు బీజం
"అమ్మ బెడ్ మీద వున్నపుడు నేను తీసిన షార్ట్ ఫిల్మ్ చూపించాలని అనుకున్నా. కానీ తను అప్పటికే అపస్మారక స్థితిలో ఉంది. నేను ఫిల్మ్ మేకర్ అవుతానని కూడా తనకి తెలీదు. ఆ విషయంలో రిగ్రేట్ వుండేది. కాలాన్ని వెనక్కి తీసుకెళ్లాలనే ఆలోచన ఈ కథకు భీజం వేసింది. నాకు సైన్స్ చాలా ఇష్టం. ఇందులో సైన్స్ లేకపోతే మెలో డ్రామా అయ్యేది. ఆడియన్స్ కి ఒక రోలర్ కోస్టర్ రైడ్ ఇవ్వాలనే ఆలోచనతోనే ఈ కథని సైన్స్ తో ట్రీట్ చేశా. సినిమా అన్ని వర్గాల ప్రేక్షకులకు నచ్చింది. మేము అనుకున్న విజయం సాధించింది. భవిష్యత్ లో మరిన్ని సైన్స్ ఫిక్షన్ సినిమాలు వస్తాయని భావిస్తున్నా."
తల్లీకొడుకులుగా అమల, శర్వానంద్ ఎందుకంటే..
"శర్వానంద్ తో పని చేయడం గొప్ప అనుభవం. ఈ సినిమా నాకు, శర్వాకి ఇద్దరికీ ఒక ఎమోషనల్ రైడ్. శర్వాకి కూడా అమ్మ అంటే ప్రాణం. శర్వా లాంటి స్టార్ ఈ సినిమా చేయడమే పెద్ద సక్సెస్. శర్వాకి ఒక మంచి సినిమా, మంచి విజయం 'ఒకే ఒక జీవితం' అవుతుందని నమ్మా. ఆ నమ్మకం నిజమైంది. అమల గారిని తీసుకోవాలనే ఆలోచన నాదే. కథ విన్న తర్వాత అమల గారికి చాలా నచ్చింది. వెంటనే సినిమా చేస్తానని చెప్పారు."
అఖిల్ చాలా ఎమోషనల్
"సినిమా చూసిన తర్వాత శర్వానంద్తో నాగార్జున గారు, ''ఇకపై నిన్ను నా కొడుకులా చూస్తా'' అన్నారు. ఈ కాంప్లిమెంట్ నాకు దొరకలేదు కానీ అది నాకు దక్కిన కాంప్లిమెంట్ లానే భావిస్తా. అలాగే అఖిల్ చాలా ఎమోషనల్ అయ్యారు. రెండురోజుల పాటు ఆ ఎమోషన్ నుండి బయటికి రాలేకపోయారు. ప్రిరిలీజ్ ఈవెంట్ కి తను రావాలి. కానీ ఆ ఎమోషన్ ని కంట్రోల్ చేయలేక రాలేకపోయారు. ఒక గొప్ప సినిమా చూసినప్పుడు సినిమా గురించి కాకుండా జీవితం గురించి మాట్లాడకుంటాం. అది 'ఒకే ఒక జీవితం'కు జరిగింది. అలాగే మారుతి గారితో పాటు మరికొందరు దర్శకులు సినిమా గురించి గొప్పగా మాట్లాడారు."
నటుడ్ని కావాలనుకొని...
"ఇంజనీరింగ్ పూర్తయిన తర్వాత డ్యాన్స్ స్కూల్ పెట్టాలని అనుకున్నా. అది కాకపోతే న్యూయార్క్ స్కూల్ లో డ్యాన్స్ లో మాస్టర్స్ చేయాలనీ అనుకున్నా. ఇదే సమయంలో ఒక డ్యాన్స్ రియాలిటీ షోలో పాల్గొన్నా. రాధిక, గౌతమి గారు ఆ షోకి న్యాయ నిర్ణేతలు. నా ఎక్స్ ప్రెషన్స్, యాక్టింగ్ బావుందని మెచ్చుకున్నారు. నాలో ఒక నమ్మకం వచ్చింది. నటుడ్ని కావాలని చాలా తిరిగా. రెండేళ్ళు అవకాశాలు రాలేదు. తర్వాత నేనే రాయాలి, నేనే తీయాలి అనే నిర్ణయానికి వచ్చాను. షార్ట్ ఫిలిమ్స్, యాడ్ ఫిలిమ్స్ చేశా."
మేమంతా బన్నీ ఫ్యాన్స్మి!
"మంచి ప్రొడక్షన్ కోసం చూస్తున్నా. నా కొత్త సినిమా తెలుగులో ఉండబోతుంది. పెద్ద స్కేల్ లో థియేటర్ ఎక్స్ పీరియన్స్ ఇచ్చే సినిమా చేయాలనే ఆలోచన వుంది. అన్ని జానర్స్ ఇష్టం. ఒక ఫాంటసీ స్క్రిప్ట్ వుంది. రియలిజం ఫాంటసీలో వుంటుంది. నా రెండో సినిమా అల్లు అర్జున్ గారితో చేయాలని వుంది. ఆయనకి వెళ్లి కథ చెప్పాలి. చెన్నైలో తెలుగు సినిమా అంటే అల్లు అర్జున్ సినిమానే. మా ఫ్యామిలీలో అంతా అల్లు అర్జున్ ఫ్యాన్సే. ఆయనతో సినిమా కోసం ఐదేళ్ళు నిరీక్షించడానికి కూడా ఓకే. నా కెరీర్ లో ఐదు సినిమాలు చేసినా అవన్నీ కూడా మంచి సినిమాలుగా ఉండాలనేదే నా లక్ష్యం."
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
