నాకు నేను త‌ప్ప ఇంకెవ్వ‌రూ ముఖ్యం కాదంటుంటాడు వ‌ర్మ‌. దానికి త‌గ్గ‌ట్టే త‌న స్వార్థం కోసం ఎవ‌రి జీవితాల‌తో అయినా ఫుట్‌బాల్ ఆడేసుకొంటుంటాడు. తాజాగా మ‌రో ఉదాహ‌ర‌ణ దొరికింది. వ‌ర్మ కొత్త చిత్రం వంగ‌వీటి ఇటీవ‌లే ప్రేక్ష‌కుల ముందుకు వ‌చ్చింది. ఈ సినిమా రిపోర్ట్‌, వివాదాలూ ప‌క్క‌న పెడితే.. 'న‌న్ను వ‌ర్మ దారుణంగా అన్యాయం చేశాడు' అంటూ ఓ సంగీత ద‌ర్శ‌కుడు మీడియా ముందు వాపోతున్నాడు. త‌నే.. రాజ‌శేఖ‌ర్‌. వంగ‌వీటి సినిమా కోసం రాజ‌శేఖ‌ర్ కూడా ప‌ని చేశాడు. నిజానికి ఈ సినిమాకి ర‌వి శంక‌ర్ సంగీత ద‌ర్శ‌కుడు. ఓ పాట మాత్రం రాజ‌శేఖ‌ర్ చేత ట్యూన్ చేయించారు. వ‌ర్మ పాడిన 'వంగ‌వీటి. వంగ‌వీటి' టైటిల్ సాంగ్ రాజ‌శేఖ‌ర్ ట్యూన్ చేసిందే. అయితే ఈ పాట‌కు త‌న‌కు ఎలాంటి క్రెడిడ్స్ ఇవ్వ‌లేద‌ని, టైటిల్స్‌లో త‌న పేరు చూపించ‌లేదని, ద‌య చేసి ఆ పాట‌ని తీసేయ్య‌మ‌ని.. వ‌ర్మ‌ని అభ్య‌ర్థించుకొంటున్నాడు రాజ‌శేఖ‌ర్‌. వీటిపై వ‌ర్మ కూడా స్పందించాడు. ట్విట్ట‌ర్‌లో రాజ‌శేఖ‌ర్ పేరు ప్ర‌స్తావించాన‌ని, వంగ‌వీటి ఆడియో ఫంక్ష‌న్‌కి కూడా రాజ‌శేఖ‌ర్‌కి పిలిచాన‌ని చెప్పుకొచ్చాడు. కొన్ని కార‌ణాల చేత‌.. అనుకోకుండా ఆ పేరు మిస్ అయి ఉంటుంద‌ని, దాన్ని  పెద్ద‌ది చేయ‌డం బాలేదంటున్నాడు. అంతేకాదు.. 'వంగ‌వీటి' ట్యూను కూడా రాజ‌శేఖ‌ర్ ది కాద‌ని, దాని ఒర్జిన‌ల్ ట్యూన్ `వంగ‌వీటి` సంగీత ద‌ర్శ‌కుడు ర‌వి శంక‌ర్‌దే అంటున్నాడు వ‌ర్మ‌.