మెగా క్యాంప్ కు షిఫ్ట్ అవుతున్న బోయపాటి..?
on Apr 12, 2016
బోయపాటి శ్రీను. ప్రస్తుతం మాస్ సినిమాలకు కేరాఫ్ అడ్రస్. ఇప్పుడున్న దర్శకుల్లో పూర్తి స్థాయి మాస్ సినిమాలు తీసే కెపాసిటీ ఉన్న అతి కొద్దిమందిలో బోయపాటి కూడా ఒకరు. ఫ్లాపుల్లో ఉన్న బాలయ్యకు భారీ హిట్లు ఇచ్చి మళ్లీ ఫాంలోకి తీసుకొచ్చిన ఘనత కూడా బోయపాటికే దక్కుతుంది. అప్పటి వరకూ స్తబ్దుగా ఉన్న బాలయ్య కెరీర్ సింహా, లెజండ్ సినిమాలతో మళ్లీ ఊపందుకుంది. దీనికి ఫుల్ క్రెడిట్ బోయపాటికి ఇవ్వాల్సిందే. ఈ సినిమాల తర్వాత బాలయ్యకు బోయపాటికి బాగా సింక్ అవుతుందనే పేరు వచ్చేసింది. స్వయంగా బాలకృష్ణే చాలా సార్లు ఈ విషయం చెప్పారు. ఈ ఇంపాక్ట్ తో బోయపాటికి నందమూరి క్యాంప్ డైరెక్టర్ అనే ముద్ర పడిపోయింది. ఎన్టీఆర్ తో కూడా దమ్ము చేశారు బోయపాటి. లేటెస్ట్ గా సరైనోడు సినిమాతో ఇప్పుడు ఆయన మెగా క్యాంప్ కు చేరువౌవుతున్నారనే మాట వినిపిస్తోంది.
దానికి తగ్గట్టే, చిరంజీవి కూడా బోయపాటి లాంటి మాస్ డైరెక్టర్ తనతో సినిమా చేయాలని స్వయంగా సరైనోడు స్టేజ్ మీద అడిగారు. అన్నీ కుదిరితే చిరు 151 వ సినిమా బోయపాటి డైరెక్షన్లోనే ఉండే అవకాశం ఉంది. సరైనోడు రిజల్ట్ బట్టి చరణ్ తో కూడా బోయపాటి సినిమా ఉండే అవకాశం లేకపోలేదు. ఈ టాక్ కారణంగానే బాలయ్య కూడా తన వందో సినిమాను క్రిష్ కు అప్పగించారట. నిజానికి మొదట తన వందో సినిమాను బోయపాటికి ఇస్తారని లెజండ్ సమయంలోనే వార్తలు వచ్చాయి. కానీ అనూహ్యంగా కృష్ణవంశీ పేరు తెరపైకి వచ్చింది. ఆ తర్వాత అంతే సడెన్ గా క్రిష్ సినిమా అనౌన్స్ అయిపోయింది. ఈ నేపథ్యంలో బాలయ్యతో బోయపాటి సినిమా ఇప్పట్లో ఉంటుందా లేదా అన్నది అనుమానంగా మారింది.