మ్యాన్ ఆఫ్ మాసెస్ ఎన్టీఆర్ (Jr NTR), సెన్సేషనల్ డైరెక్టర్ ప్రశాంత్ నీల్ (Prashanth Neel) కాంబినేషన్‌లో వస్తున్న మోస్ట్ అవేటెడ్ పాన్-ఇండియా యాక్షన్ ఎంటర్‌టైనర్ సినిమా (NTRNeel) అప్‌డేట్ కోసం ప్రపంచవ్యాప్తంగా ఉన్న అభిమానులు ఎంతగానో ఎదురుచూస్తున్నారు. ఎట్టకేలకు ఆ అద్భుతమైన క్షణం రానే వచ్చేసింది. 

టాలీవుడ్‌లో ఎన్నడూ లేని విధంగా ఒక సరికొత్త ట్రెండ్‌ను సెట్ చేస్తూ, ఈ క్రేజీ ప్రాజెక్ట్ యొక్క అఫీషియల్ టైటిల్, ఫస్ట్ గ్లింప్స్ వీడియోను మే 19 అర్ధరాత్రి ఎగ్జాక్ట్‌గా 12 గంటలకు విడుదల చేయడానికి మేకర్స్ ముహూర్తం ఖరారు చేశారు. మే 20న ఎన్టీఆర్ పుట్టినరోజు పురస్కరించుకుని అభిమానులకు అంతకంటే పెద్ద ట్రీట్ మరొకటి ఉండదని చెప్పాలి. ఈ సినిమాకు మొదటి నుండి ప్రచారంలో ఉన్న ‘డ్రాగన్’ (Dragon) అనే పవర్‌ఫుల్ టైటిల్‌ను ఈ గ్లింప్స్ ద్వారానే అధికారికంగా ప్రకటించబోతున్నట్లు సినీ వర్గాల సమాచారం.

సాధారణంగా టీజర్లు లేదా గ్లింప్స్ వీడియోలు ఒక నిమిషం లేదా రెండు నిమిషాల నిడివితో ఉంటాయి. కానీ డైరెక్టర్ ప్రశాంత్ నీల్ ఈసారి ట్రేడ్ వర్గాలను సైతం ముక్కున వేలేసుకునేలా ఒక భారీ షాక్ ఇవ్వబోతున్నారు. ఈ చిత్ర గ్లింప్స్ ఏకంగా 4 నిమిషాల 35 సెకన్ల పాటు సాగనుందని ఇండస్ట్రీ టాక్. ఒక పూర్తి స్థాయి ట్రైలర్ కంటే ఎక్కువ నిడివితో వస్తున్న ఈ గ్లింప్స్ వీడియో ద్వారా ప్రశాంత్ నీల్ తను సృష్టించిన సరికొత్త ప్రపంచాన్ని, అందులోని పాత్రల స్వభావాన్ని ప్రేక్షకులకు పరిచయం చేయబోతున్నారు. 

ఎన్టీఆర్ మాస్ ఇమేజ్‌ను నెక్స్ట్ లెవెల్‌లో ఎలివేట్ చేస్తూ, వెన్నులో వణుకు పుట్టించే హై-వోల్టేజ్ యాక్షన్ సీక్వెన్స్, మైండ్ బ్లోయింగ్ విజువల్స్ ఈ వీడియోలో హైలైట్‌గా నిలవనున్నాయి. కేజీఎఫ్, సలార్ చిత్రాలకు అద్భుతమైన సంగీతాన్ని అందించిన రవి బస్రూర్, ఈ చిత్రానికి కూడా తనదైన బ్యాక్‌గ్రౌండ్ స్కోర్‌తో థియేటర్లలో పూనకాలు తెప్పించడం ఖాయంగా కనిపిస్తోంది.

మైత్రీ మూవీ మేకర్స్, ఎన్టీఆర్ ఆర్ట్స్ సంస్థలు అత్యంత ప్రతిష్టాత్మకంగా, భారీ బడ్జెట్‌తో ఈ యాక్షన్ సాగాను నిర్మిస్తున్నాయి. ఈ చిత్రంలో కన్నడ బ్యూటీ రుక్మిణి వసంత్ హీరోయిన్ గా నటిస్తుండగా, బాలీవుడ్ సీనియర్ స్టార్ అనిల్ కపూర్ ఒక కీలక పాత్రలో కనిపించబోతున్నారని సమాచారం. 

ఈ సినిమా షూటింగ్ పనులు శరవేగంగా జరుగుతుండగా, ప్రపంచవ్యాప్తంగా జూన్ 11, 2027న ఈ చిత్రం థియేటర్లలో గ్రాండ్‌గా విడుదల కానుంది. ఎన్టీఆర్ పుట్టినరోజు వేడుకలను ఒక రోజు ముందే ప్రారంభించేలా ప్లాన్ చేసిన ఈ అర్ధరాత్రి సర్ప్రైజ్ సోషల్ మీడియాలో ఎలాంటి రికార్డులను కొల్లగొడుతుందో చూడాలి.