హాలీవుడ్ చిత్ర పరిశ్రమలో తీవ్ర విషాదం నెలకొంది. వెండితెరపై దశాబ్దాల పాటు తన విలక్షణ నటనతో అలరించిన ప్రముఖ సీనియర్ నటుడు జేమ్స్ హ్యాండీ (81) దారుణ హత్యకు గురయ్యారు. లాస్ ఏంజిల్స్లోని ఆయన స్వగృహంలోనే ఈ ఘోరం చోటుచేసుకోవడం అంతర్జాతీయంగా సినీ వర్గాలను, అభిమానులను తీవ్ర దిగ్భ్రాంతికి గురిచేస్తోంది. అత్యంత కిరాతకంగా ఆయన ఛాతీపై కత్తితో పొడిచి ప్రాణాలు తీయడం హాలీవుడ్లో కలకలం రేపుతోంది.
పోలీసుల ప్రాథమిక సమాచారం ప్రకారం.. కాలిఫోర్నియాలోని టార్జానా ప్రాంతంలో ఉన్న జేమ్స్ హ్యాండీ నివాసంలో ఈ ఘటన జరిగింది. బుధవారం ఉదయం ఆయన ఇంటి ఆవరణలో అపస్మారక స్థితిలో పడి ఉండడాన్ని గమనించిన స్థానికులు, వెంటనే ఆసుపత్రికి తరలించే ప్రయత్నం చేశారు. అయితే దురదృష్టవశాత్తూ మార్గమధ్యంలోనే ఆయన కన్నుమూసినట్లు వైద్యులు ధృవీకరించారు.
ఈ దారుణ హత్యకు పాల్పడింది మరెవరో కాదు.. జేమ్స్ హ్యాండీ ప్రియురాలి కుమారుడైన 44 ఏళ్ల మైఖేల్ గ్లెడ్ హిల్ అని తేలింది. నిందితుడే స్వయంగా 911 అత్యవసర నంబర్కు ఫోన్ చేసి, తాను ఒక పాప పురుషుడిని అంతమొందించానంటూ పోలీసులకు సమాచారం ఇవ్వడం గమనార్హం. అధికారులు ఘటనా స్థలానికి చేరుకోగానే, "మీరు వెతుకుతున్నది నన్నే" అంటూ నేరాన్ని అంగీకరించి లొంగిపోయాడు. అయితే ఈ హత్య వెనుక ఉన్న అసలు కారణాలు ఏమిటనేది ఇంకా తెలియరాలేదు.
జేమ్స్ హ్యాండీ సుదీర్ఘ సినీ ప్రస్థానాన్ని పరిశీలిస్తే.. 1977లో 'ర్యాన్స్ హోప్' అనే టెలివిజన్ సిరీస్తో ఆయన ప్రయాణం మొదలైంది. ఆ తర్వాత 'లోగాన్', 'కె 911', 'లా అండ్ ఆర్డర్', 'క్రిమినల్ మైండ్స్' వంటి ఎన్నో సూపర్ హిట్ చిత్రాలు, పాపులర్ సిరీస్లలో విభిన్నమైన పాత్రలు పోషించి గుర్తింపు తెచ్చుకున్నారు. ముఖ్యంగా 'జుమాంజి', అలాగే 2022లో వచ్చిన 'టాప్ గన్: మావెరిక్' చిత్రాల్లోని ఆయన నటనకు ప్రేక్షకులు బ్రహ్మరథం పట్టారు.
ఈ సీనియర్ నటుడి అకాల మరణం పట్ల సోషల్ మీడియా వేదికగా నెటిజన్లు, సినీ ప్రముఖులు తీవ్ర సంతాపం వ్యక్తం చేస్తున్నారు. ఇంతటి ప్రతిభావంతుడైన నటుడి జీవితం ఇలా ఘోర హత్యతో ముగిసిపోవడం జీర్ణించుకోలేకపోతున్నామంటూ అభిమానులు ఎమోషనల్ అవుతున్నారు. ప్రస్తుతం లాస్ ఏంజిల్స్ పోలీసులు కేసు నమోదు చేసుకుని నిందితుడిని విచారిస్తున్నారు. అసలు ఏ కక్షతో ఈ ఘాతుకానికి ఒడిగట్టాడనే పూర్తి వివరాలు త్వరలోనే వెల్లడి కానున్నాయి.
