సౌత్ ఇండస్ట్రీలో వరుస సినిమాలతో బిజీగా ఉన్న స్టార్ మ్యూజిక్ డైరెక్టర్ జీవీ ప్రకాష్ కుమార్‌కు ఇప్పుడు బాలీవుడ్‌లో తన సత్తా చాటుకునే అవకాశం వచ్చింది. గతంలో కొన్ని హిందీ సినిమాలకు పనిచేసిన ఆయన.. ఇప్పుడు ఏకంగా ఒక పూర్తి హిందీ సినిమా ఆల్బమ్‌కు సంగీతం అందిస్తున్నారు. యామీ గౌతమ్ ప్రధాన పాత్రలో నటిస్తున్న ‘నయీ నవేలీ’ సినిమాకు పాటలతో పాటు బ్యాక్‌గ్రౌండ్ స్కోర్‌ను కూడా ఆయనే సమకూర్చారు. అక్టోబర్ 16న విడుదల కానున్న ఈ సినిమాపై జీవీ ప్రకాష్ చాలా ఆశలు పెట్టుకున్నారు.
నిజానికి జీవీ ప్రకాష్‌కు బాలీవుడ్ కొత్తేమీ కాదు. గతంలో ‘గ్యాంగ్స్ ఆఫ్ వాసేపూర్’ సినిమాలకు బ్యాక్‌గ్రౌండ్ స్కోర్ అందించడంతో పాటు ‘జోకర్’, ‘అగ్లీ’ వంటి చిత్రాలకు పాటలు కంపోజ్ చేశారు. అయితే ఒక హిందీ సినిమాకు పూర్తి స్థాయిలో సంగీతం అందించడం మాత్రం ‘నయీ నవేలీ’తోనే జరుగుతోంది. ఆనంద్ ఎల్. రాయ్ నిర్మాణంలో, మారి సినిమాతో గుర్తింపు తెచ్చుకున్న బాలాజీ మోహన్ దర్శకత్వంలో ఈ చిత్రం తెరకెక్కుతోంది. దీంతో ఈ ప్రాజెక్ట్ జీవీ ప్రకాష్ కెరీర్‌లో కీలకమైన మైలురాయిగా మారనుంది.
ఇక ఈ ఏడాది జీవీ ప్రకాష్‌కు కలిసొస్తున్నట్టే కనిపిస్తోంది. గతంలో ఆయన సంగీతం అందించిన కొన్ని సినిమాలు బాక్సాఫీస్ దగ్గర ఆశించిన ఫలితాలు అందుకోలేకపోయినా.. ఈ ఏడాది మాత్రం వరుస ప్రాజెక్టులతో దూసుకెళ్తున్నారు. ‘విశ్వనాథ్ అండ్ సన్స్’, ‘ఇరుముడి’, ‘మండాడి’ వంటి సినిమాలతో బిజీగా ఉన్న ఆయనకు ‘అమరన్’ చిత్రానికి అందించిన బ్యాక్‌గ్రౌండ్ స్కోర్‌కు జాతీయ అవార్డు కూడా దక్కింది. ఇప్పుడు బాలీవుడ్‌లోనూ తన సంగీతంతో ప్రేక్షకులను ఆకట్టుకోవాలని చూస్తున్నారు.
సంగీతానికి భాషా సరిహద్దులు ఉండవని నమ్మే జీవీ ప్రకాష్.. తెలుగు, తమిళ సినిమాలకు పనిచేసినట్టే హిందీ చిత్రానికీ పూర్తి స్థాయిలో సంగీతం అందించడం మరో సవాలుగా భావిస్తున్నారు. ‘నయీ నవేలీ’ పాటలు ప్రేక్షకులకు నచ్చితే బాలీవుడ్‌లో మరిన్ని పెద్ద అవకాశాలు వచ్చే అవకాశం ఉంది. మరి ఈ హారర్ కామెడీ సినిమా జీవీ ప్రకాష్‌కు హిందీలో మంచి గుర్తింపు తీసుకొస్తుందా? ఆయన కెరీర్‌కు కొత్త మలుపు అవుతుందా? అనేది చూడాలి.
[GV Prakash Kumar, Nayyi Navelli Movie, GV Prakash Bollywood Debut, Yami Gautam Nayyi Navelli, Nayyi Navelli Release Date, GV Prakash Latest News, Aanand L Rai Movies]
