ప్రపంచ చలనచిత్ర రంగంలో అత్యంత ప్రతిష్ఠాత్మకంగా భావించే అకాడమీ అవార్డ్స్ (ఆస్కార్స్) బరిలో మన దేశం తరఫున నిలిచే అధికారిక ఎంట్రీ ఖరారైంది. 99వ ఆస్కార్ వేడుకలకు సంబంధించి 'ఉత్తమ అంతర్జాతీయ చిత్రం' (Best International Feature Film) కేటగిరీలో మరాఠీ చిత్రం 'గోంధళ్'ను భారత్ అధికారిక ఎంట్రీగా ఎంపిక చేశారు. ఈ విషయాన్ని ఫిల్మ్ ఫెడరేషన్ ఆఫ్ ఇండియా (FFI) అధికారికంగా ధ్రువీకరించింది.
మహారాష్ట్రకు చెందిన విశిష్ట సంప్రదాయ జానపద కళారూపమైన 'గోంధళ్' నేపథ్యంగా ఈ సినిమా రూపుదిద్దుకుంది. సంగీతం, నృత్యం, పౌరాణిక కథాంశాల కలనేతగా సాగే ఈ సంప్రదాయ ప్రదర్శనను దర్శకుడు సంతోష్ దవాఖర్ అత్యంత సహజంగా వెండితెరపై ఆవిష్కరించారు.
ఈ చిత్రంలో కిశోర్ కదమ్, ఇషితా దేశ్ముఖ్, యోగేశ్ సోహోని తమ నటనతో ఆకట్టుకున్నారు. ఈ ఏడాది ఆస్కార్ రేసులో నిలిచేందుకు భారతీయ సినిమా పరిశ్రమ నుంచి ఏకంగా 33 సినిమాలు పోటీపడ్డాయి. దిల్జిత్ దోసాంజ్ నటించిన 'మై వాపస్ ఆవూంగా', భారీ యాక్షన్ డ్రామా 'బోర్డర్ 2', రణ్వీర్ సింగ్ 'ధురంధర్' వంటి ఎన్నో క్రేజీ చిత్రాలు ఈ జాబితాలో ఉన్నాయి.
ఇది కూడా చదవండి: ఓటీటీలోనూ అదే జోరు.. 'ఇరుముడి'కి బ్రహ్మరథం పడుతున్న మూవీ లవర్స్.!
అయితే, కమర్షియల్ హంగుల కంటే కథలోని నేటివిటీ, సాంస్కృతిక ప్రాధాన్యతకే జ్యూరీ ప్రాధాన్యమిచ్చి 'గోంధళ్'ను ఎంపిక చేసింది. మరాఠీ చిత్రసీమకు ఇది మరొక చారిత్రాత్మక ఘట్టంగా నిలిచింది. గతంలో 'శ్వాస్', 'హరిశ్చంద్రాచి ఫ్యాక్టరీ', 'కోర్ట్' వంటి సినిమాలు ఆస్కార్ బరిలో భారత్ తరఫున పోటీపడగా, ఆ ఘనత సాధించిన నాలుగో మరాఠీ చిత్రంగా 'గోంధళ్' రికార్డుల్లోకెక్కింది.
గతేడాది 98వ ఆస్కార్ వేడుకల్లో నీరజ్ ఘైవాన్ తెరకెక్కించిన 'హోమ్బౌండ్' టాప్-15 షార్ట్లిస్ట్ వరకు వెళ్లి దేశానికి మంచి గుర్తింపు తెచ్చిన సంగతి తెలిసిందే. ఈ ప్రకటన వెలువడిన వెంటనే సోషల్ మీడియాలో సినీ ప్రియులు, విమర్శకులు సంతోషం వ్యక్తం చేస్తున్నారు.
భారీ బడ్జెట్ సినిమాలను కాదని, మన దేశీ కళారూపాలకు అద్దం పట్టే కథను ఎంపిక చేయడంపై హర్షం వ్యక్తం చేస్తూ 'గోంధళ్' చిత్రబృందానికి శుభాకాంక్షలు తెలుపుతున్నారు. ఈ ప్రతిష్ఠాత్మక 99వ అకాడమీ అవార్డుల ప్రదానోత్సవం 2027 మార్చి 14న లాస్ ఏంజిల్స్లోని ప్రఖ్యాత డాల్బీ థియేటర్లో ఘనంగా జరగనుంది.
వీటికి సంబంధించిన అధికారిక నామినేషన్లను 2027 జనవరి 21న వెల్లడించనుండగా, ఈసారి 'గోంధళ్' చిత్రం తుది నామినేషన్ల రేసులో నిలిచి గ్లోబల్ వేదికపై మెరుస్తుందో లేదో చూడాలి.
మీకు నచ్చవచ్చు: ఈ ఏడాది డిస్ట్రిబ్యూటర్లకి భారీ నష్టాలు మిగిల్చిన టాప్ సినిమాలు ఇవే!
[Gondhal Marathi Movie, Oscars 2027 India Official Entry, Academy Awards Best International Film, Santosh Davakhar Gondhal, Marathi Cinema Oscars Entry]
