నువ్వు ఎంత తోపు, తురుమ్ అయినా ఇండస్ట్రీలో సక్సెస్ మాత్రమే మాట్లాడుతుంది. మాట్లాడటమే కాదు ఊపిరిసలపని బిజీగా మార్చేస్తుంది. భారీ ఫ్యాన్ బేస్ ఉంటుంది కాబట్టి ఈ విషయంలో బడా హీరోలకి కొంచం డిస్కౌంట్ ఉంటుందని చెప్పవచ్చు. కానీ హీరోయిన్ల పరిస్థితి వేరు. హీరోయిన్ ఖాతాలో వరుసగా 2 ఫ్లాపులు పడ్డాయంటే చాలు, ఆమె కెరీర్ ఇరకాటంలో పడినట్లే. 

ఇక ఇండస్ట్రీలో ఉండే సెంటిమెంట్ల కారణంగా అలాంటి నాయికలని  ఐరన్ లెగ్ అంటూ పక్కన పెట్టేయడం చాలా కాలంగా చూస్తున్నదే. అయితే, మారుతున్న టాలీవుడ్ సమీకరణాల్లో ఇప్పుడు సరికొత్త ట్రెండ్ కనిపిస్తోంది. గతంలో లాగా ఫ్లాపులు రాగానే ఫేడవుట్ అయిపోకుండా, వరుస పరాజయాల ఎదురుదెబ్బల నుంచి కూడా కొంతమంది హీరోయిన్లు అద్భుతంగా పుంజుకుంటున్నారు. అగ్ర నిర్మాణ సంస్థలు, స్టార్ డైరెక్టర్లు సెంటిమెంట్లని  పక్కనబెట్టి మరీ వీరికి క్రేజీ ఆఫర్లు ఇస్తుండటం గమనార్హం.

ఈ సరికొత్త ట్రెండ్‌లో అందరికంటే ముందు వరుసలో నిలిచింది నటి కయదు లోహర్(Kayadu Lohar). ప్రీవియస్ మూవీ  'ఫంకీ' ప్లాప్ గా నిలిచింది. ఆ సినిమా పరాజయ తీవ్రత చూసి, ఈ ముద్దుగుమ్మ కెరీర్ ఇక ముగిసిపోయిందని అంతా భావించారు. కానీ, అందరి అంచనాలను తలకిందులు చేస్తూ టాలీవుడ్, కోలీవుడ్‌లలో తిరుగులేని విధంగా నిలబడింది. ప్రస్తుతం ఆమె చేతిలో వివిధ భాషల్లో ఏకంగా 6 సినిమాలు ఉన్నాయి. నేచురల్ స్టార్ నాని సరసన ప్రతిష్టాత్మక 'ది ప్యారడైజ్' చిత్రంలో చేస్తున్న కయదు, ఇటీవలే హోంబలే ఫిలిమ్స్ బ్యానర్‌లో కోలీవుడ్ స్టార్ సూర్య పక్కన నటించే బంపర్ ఆఫర్‌ సొంతం చేసుకుంది.

మరోవైపు, టాలీవుడ్‌లో ఇప్పటివరకు ఒక్క సారైనా  హిట్ కూడా నమోదు చేయలేకపోయిన నార్త్ బ్యూటీ భాగ్యశ్రీ బోర్సే(Bhagyashri Borse)కూడా అవకాశాల వేటలో దూసుకుపోతోంది. మిస్టర్ బచ్చన్, కింగ్డమ్, కాంత, ఆంధ్రా కింగ్ వంటి సినిమాలు వరుసగా డిజాస్టర్లుగా మిగిలాయి. టాలీవుడ్ చరిత్రలో ఒక కొత్త హీరోయిన్‌కి మొదటి 3 లేదా 4 సినిమాలు వరుసగా ఫ్లాప్ అయితే అవకాశాలు రావడం అసాధ్యం. కానీ, భాగ్యశ్రీకి మాత్రం ఛాన్సులకు కొదవే లేకుండా పోయింది. ఈ నెల 10 న 'లెనిన్' తో  రానుంది. ప్రస్తుతం కోలీవుడ్ క్రేజీ హీరో శివకార్తికేయన్‌తో జతకడుతున్న ఈమె, టాలీవుడ్ టాప్ ప్రొడక్షన్ హౌస్ 'స్వప్న సినిమాస్' బ్యానర్‌లో ఓ భారీ ప్రాజెక్ట్‌కు సంతకం చేసింది. అంతేకాదు, మలయాళ చిత్ర పరిశ్రమలో లెజెండరీ నటుడు మోహన్‌లాల్ సరసన నటించే అరుదైన అవకాశం కూడా ఈమె ఖాతాలో చేరింది.

ఇదే కోవలో ప్రీతి ముకుందన్ కూడా ఇప్పుడిప్పుడే ఇండస్ట్రీలో నిలదొక్కుకుంటోంది. 'కన్నప్ప' లాంటి భారీ చిత్రం ఆశించిన ఫలితాన్ని ఇవ్వకపోవడంతో తెలుగులో ఈమెకు బ్రేక్ రాలేదు. కానీ, ఆమె నటించిన 'బ్లాస్ట్' అనే తమిళ చిత్రం అక్కడ ఘనవిజయం సాధించడంతో పాటు, తెలుగులోనూ మంచి గుర్తింపు తెచ్చింది. ఈ సినిమా విడుదల కాకముందే టాలీవుడ్ యంగ్ హీరో శర్వానంద్ సరసన నటించే లక్కీ ఛాన్స్ ఆమెను వరించింది. రాబోయే రోజుల్లో ప్రీతి మరికొన్ని క్రేజీ తెలుగు ప్రాజెక్టులతో బిజీ కానుంది.

Also read: Dhruv vikram: ధ్రువ్ విక్రమ్ హీరోగా మైత్రీ మూవీ మేకర్స్ మూవీ ప్రారంభం..స్పెషల్ ఇదే   

ఇక ఒకప్పుడు వరుస హిట్లు కొట్టి, ఆ తర్వాత వరుస పరాజయాలు మరియు వ్యక్తిగత ప్రమాదాల (Accidents) వల్ల కెరీర్‌లో లాంగ్ గ్యాప్ తీసుకున్న నభా నటేష్, కృతి శెట్టిలు కూడా రీఎంట్రీలో దుమ్మురేపుతున్నారు. నభా నటేష్ ప్రస్తుతం పీరియాడిక్ డ్రామా 'స్వయంభూ'తో పాటు 'నాగబంధం' అనే భారీ చిత్రాలలో నటిస్తోంది. నాగ బంధం రేపు థియేటర్స్ లో అడుగుపెట్టనుంది. 'ఉప్పెన' తో ఓవర్ నైట్ స్టార్‌గా మారిన కృతి శెట్టి, ఆ తర్వాత వరుసగా ఫ్లాపులు ఎదుర్కొన్నప్పటికీ, ప్రస్తుతం స్టార్ డైరెక్టర్ అనిల్ రావిపూడి దర్శకత్వంలో చేస్తు బిజీగా ఉంది. సెంటిమెంట్ల కంటే నటన, గ్లామర్,  స్క్రీన్ ప్రెజెన్స్‌కే మేకర్స్ ప్రాధాన్యత ఇస్తున్నారని ఈ నాయికల లైన్ అప్ చూస్తే స్పష్టమవుతోంది.