మెగాస్టార్ చిరంజీవి తన అభిమానులను కేవలం ఆరాధకులుగానే కాకుండా సొంత కుటుంబ సభ్యుల్లా భావిస్తారని మరోసారి నిరూపితమైంది. ఓ సాధారణ సినిమా టెక్నీషియన్ తనపై, తన కుమారుడిపై చూపించిన అమితమైన ప్రేమకు ముగ్ధుడైన మెగాస్టార్.. ఆ అభిమాని కుటుంబాన్ని ప్రత్యేకంగా తన నివాసానికి ఆహ్వానించి సర్ప్రైజ్ చేశారు.
ఈ అరుదైన మరియు ఆత్మీయమైన సంఘటన ప్రస్తుతం టాలీవుడ్ వర్గాల్లోనూ, సోషల్ మీడియాలోనూ నెటిజన్ల హృదయాలను గెలుచుకుంటోంది. రామ్ చరణ్ కూడా ఈ భేటీలో పాల్గొని ఆ అభిమాని కుటుంబంతో కాసేపు సరదాగా సమయాన్ని గడిపారు.
ప్రస్తుతం చిరంజీవి ‘మెగా 158’ సినిమా షూటింగ్తో ఫుల్ బిజీగా ఉన్నారు. ఈ మూవీ సెట్స్లో కెమెరా విభాగంలో పనిచేస్తున్న నివాస్ అనే టెక్నీషియన్ను చిరంజీవి ఆప్యాయంగా పలకరించారు. ఆ సంభాషణలో నివాస్ తాను గ్లోబల్ స్టార్ రామ్ చరణ్కు వీరాభిమానని, ఆ ప్రేమాభిమానంతోనే తన కొడుక్కి ‘జస్వంత్ రామ్ చరణ్’ అని పేరు పెట్టుకున్నట్లు చెప్పారు.
తన కుటుంబంపై ఒక సాధారణ టెక్నీషియన్ చూపిస్తున్న నిష్కల్మషమైన ప్రేమను చూసి చిరంజీవి ఎంతో భావోద్వేగానికి గురయ్యారు. వెంటనే నివాస్ ఫ్యామిలీని తన ఇంటికి రావాల్సిందిగా ప్రేమగా ఆహ్వానించారు. మెగాస్టార్ నుంచి పిలుపురావడంతో ఆనందంతో మునిగిపోయిన నివాస్, తన కుటుంబంతో కలిసి చిరంజీవి ఇంటికి వెళ్లారు.
అక్కడ ఆ కుటుంబానికి ఊహించని సర్ప్రైజ్ లభించింది. స్వయంగా రామ్ చరణ్ కూడా అక్కడకు వచ్చి, చిన్నారి జస్వంత్ రామ్ చరణ్ను ఎంతో ఆప్యాయంగా ఎత్తుకుని కాసేపు ముచ్చటించారు. అనంతరం నివాస్ కుటుంబ సభ్యులతో కలిసి చిరు, చరణ్ ఫొటోలు దిగి ఆ క్షణాలను మరచిపోలేని జ్ఞాపకంగా మార్చారు.
దీనికి సంబంధించిన ఫొటోలు నెట్టింట ప్రత్యక్షమవ్వడంతో మెగా అభిమానులు అభినందనల వర్షం కురిపిస్తున్నారు. తమ అభిమాన కథానాయకుల సంస్కారం, ఆత్మీయత పట్ల ప్రశంసలు కురిపిస్తూ కామెంట్లు పెడుతున్నారు. సాధారణ టెక్నీషియన్కు మెగా కుటుంబం ఇచ్చిన ఈ గౌరవం, అభిమానులతో వారికి ఉండే అవినాభావ బంధానికి నిదర్శనమని ఇండస్ట్రీ వర్గాలు కొనియాడుతున్నాయి.
Chiranjeevi, Ram Charan, Mega 158, Mega Fan Nivas, Jaswanth Ram Charan
