తెలుగు చలనచిత్ర పరిశ్రమలో కేవలం సినిమాలు నిర్మించడమే కాకుండా, కష్టాల్లో ఉన్న సినీ కార్మికులను ఆదుకోవడంలో ఎప్పుడూ ముందుండే పెద్ద మనసున్న వ్యక్తి ప్రముఖ నిర్మాత, దర్శకుడు చదలవాడ శ్రీనివాసరావు. గతంలో చిత్రపురి కాలనీ వేలం దశకు వెళ్లకుండా కోట్లాది రూపాయల ఆర్థిక సాయం అందించి వందలాది కుటుంబాల సొంతింటి కలను నిలబెట్టిన ఆయన, తాజాగా మరో అద్భుతమైన నిర్ణయంతో వార్తల్లో నిలిచారు.

ఇటీవలే ఆంధ్రప్రదేశ్ ఫిల్మ్ డెవలప్‌మెంట్ కార్పొరేషన్ (AP FDC) బోర్డ్ ఆఫ్ డైరెక్టర్‌గా బాధ్యతలు స్వీకరించిన చదలవాడ శ్రీనివాసరావును ఫిలిం ఎంప్లాయిస్ ఫెడరేషన్ ప్రతినిధులు మర్యాదపూర్వకంగా కలిశారు. ఈ సందర్భంగా రెండు రాష్ట్రాల్లోని సినీ కార్మికుల సమస్యలను, తమకు శాశ్వత భవనం లేని లోటును ఆయన దృష్టికి తీసుకెళ్లారు. దీనిపై చదలవాడ తక్షణమే సానుకూలంగా స్పందించి కార్మికులకు ఒక భారీ వరాన్ని ప్రకటించారు.

ఫెడరేషన్ నాయకుల విజ్ఞప్తిని ఆలకించిన ఆయన, ప్రభుత్వం నుంచి తగిన స్థలాన్ని సేకరిస్తే, అక్కడ దేశంలోనే మరే సినీ ఫెడరేషన్‌కు లేనంతటి అత్యాధునిక వసతులతో కూడిన భవనాన్ని పూర్తి సొంత ఖర్చులతో నిర్మించి ఇస్తానని హామీ ఇచ్చారు. ఈ నిర్మాణానికి ఎవరి వద్ద నుండి ఒక్క రూపాయి కూడా విరాళం సేకరించవద్దని ఆయన స్పష్టం చేశారు. అంతేకాకుండా, ఈ ప్రతిష్టాత్మక భవనానికి తెలుగువారి ఆరాధ్యదైవం, మహానటుడు నందమూరి తారకరామారావు (ఎన్టీఆర్) పేరు పెట్టనున్నట్లు ప్రకటించడం విశేషం.

ఈ సందర్భంగా సినీ పరిశ్రమ మనుగడ సాగించాలంటే కాస్ట్ ఆఫ్ ప్రొడక్షన్ తగ్గించుకోవాలని చదలవాడ హితవు పలికారు. సినిమాలు పర్సెంటేజ్ పద్ధతిలో ఆడాలని, హీరోలు యాభై నుండి అరవై రోజుల కాల్షీట్లు ఇవ్వాలని, పారితోషికాన్ని సినిమా విడుదలకు ముందు, తర్వాత సర్దుబాటు చేసుకునేలా కొత్త విధానాన్ని నిర్మాతల మండలి తీసుకురావాలని సూచించారు. కనుమరుగవుతున్న ఫైనాన్సియర్ వ్యవస్థను కాపాడుకుంటూ, షూటింగ్ లొకేషన్లలో కారవాన్ల ఖర్చులను తగ్గించుకుంటే పరిశ్రమ ఊపిరి పీల్చుకుంటుందని ఆయన పలు కీలక సూచనలు చేశారు.

చదలవాడ శ్రీనివాసరావు చేసిన ఈ ప్రకటనపై ఫిలిం ఫెడరేషన్ వర్గాలతో పాటు చిత్ర పరిశ్రమ అంతటా హర్షాతిరేకాలు వ్యక్తమవుతున్నాయి. ఫెడరేషన్ అధ్యక్షుడు వల్లభనేని అనిల్, ప్రధాన కార్యదర్శి రాజేంద్ర ప్రసాద్ తదితరులు ఆయన దాతృత్వానికి కృతజ్ఞతలు తెలిపారు. చదలవాడ లాంటి మనసున్న మహారాజు తెలుగు ఇండస్ట్రీలో ఉండటం కార్మికుల అదృష్టమని సామాజిక మాధ్యమాల్లో సినీ అభిమానులు అభినందనలు కురిపిస్తున్నారు.

ఈ కీలక భవన నిర్మాణానికి సంబంధించిన ల్యాండ్ అలౌట్‌మెంట్ ప్రక్రియ త్వరలోనే పూర్తి కానుండగా, ఇండస్ట్రీని గాడిలో పెట్టేందుకు ఆయన సూచించిన మార్గదర్శకాలపై నిర్మాతల మండలి ఎలాంటి ముందడుగు వేస్తుందో చూడాలి.