కట్టప్ప బాహుబలిని చంపలేదట..!
on Apr 13, 2016
బాహుబలిని కట్టప్ప ఎందుకు చంపాడు..? గతేడాది ఇండియా వైడ్ మారుమోగిపోయిన క్వశ్చన్ ఇది. రాజమౌళి, విజయేంద్రప్రసాద్ లు ఎక్కడికెళ్లినా వాళ్లకు ఇదే ప్రశ్న ఎదురయ్యేది. ఎలాగో కష్టపడి దీని బారి నుంచి బయటపడేవారు. విజయేంద్రప్రసాద్ అయితే, ఒకడుగు ముందుకేసి తానే ఏదో ఒక ఎదురు ప్రశ్న వేసి కన్ఫ్యూజ్ చేస్తున్నారు. బాహుబలిని కట్టప్ప పొడిచాడు అంతే అని గతంలో ఒక ఇంటర్వ్యూలో సమాధానం చెప్పిన ప్రసాద్, రీసెంట్ గా ఇదే ప్రశ్నకు అసలు బాహుబలి చనిపోయాడని ఎందుకు అనుకుంటున్నారు అని ఎదురు ప్రశ్న వేశారు. దీంతో ఇప్పుడు ప్రేక్షకులకు కొత్త ట్విస్ట్ ఎదురైంది. ఒక పత్రికకు ఇచ్చిన ఇంటర్వ్యూలో ఆయన ఈ ఇంట్రస్టింగ్ వ్యాఖ్యలు చేశారు. సినిమాలో ప్రతీ పాత్ర కూడా మహాభారత, రామాయణాల్లో పాత్రల నుంచి స్ఫూర్తిగా తీసుకున్నదే అని ఆయన చెబుతున్నారు. శివగామిలో కైకేయి, గాంధారి, కుంతీదేవి ఛాయలుంటే, బిజ్జలదేవుడిలో శకుని యాంగిల్ ఉంటుందని, భల్లాలదేవుడిలో రావణుడు, ధుర్యోధనుడు, బాహుబలి పాత్రలో రాముడు, అర్జునుడు కనిపిస్తారని విజయేంద్ర ప్రసాద్ చెప్పారు. ఇంతకీ, రెండో పార్ట్ లో బాహుబలి మళ్లీ వస్తాడా..? ఈ ప్రశ్నకు సమాధానం దొరకాలంటే, వచ్చే ఏడాది ఏప్రిల్ 14 వరకూ ఆగాల్సిందే మరి..