మెగా పవర్ స్టార్ రామ్ చరణ్ (Ram Charan), డైరెక్టర్ బుచ్చిబాబు సానా (Buchi Babu Sana) కాంబినేషన్లో వచ్చిన తాజా చిత్రం 'పెద్ది' (Peddi) బాక్సాఫీస్ వద్ద కలెక్షన్ల సునామీ సృష్టిస్తోంది. ఈ మైండ్ బ్లోయింగ్ స్పోర్ట్స్ డ్రామా చిత్రం సాధారణ ప్రేక్షకులనే కాకుండా పరిశ్రమలోని ప్రముఖులను సైతం విపరీతంగా ఆకట్టుకుంటోంది. తాజాగా ఈ సినిమాను వీక్షించిన ఐకాన్ స్టార్ అల్లు అర్జున్ (Allu Arjun) సోషల్ మీడియా వేదికగా స్పందిస్తూ చిత్రంపై, చిత్ర యూనిట్పై ప్రశంసల జల్లు కురిపించారు. ముఖ్యంగా రామ్ చరణ్ నటనను ఆకాశానికెత్తేస్తూ అల్లు అర్జున్ చేసిన ట్వీట్ ఇప్పుడు నెట్టింట విపరీతంగా వైరల్ అవుతోంది.
తాను నిన్న రాత్రి 'పెద్ది' సినిమా చూశానని, నా ప్రియమైన రామ్ చరణ్ మైండ్ బ్లోయింగ్ పర్ఫార్మెన్స్ ఇచ్చాడంటూ అల్లు అర్జున్ తన హర్షాన్ని వ్యక్తం చేశారు. సినిమాలో చరణ్ నటన అత్యంత సహజంగా, గ్రిట్టీగా మరియు రా (raw) గా ఉందంటూ ప్రశంసించారు. ఈ పాత్ర కోసం రామ్ చరణ్ చేసిన అసాధారణమైన బాడీ ట్రాన్స్ఫర్మేషన్ మరియు సినిమాలో ఆయన చేసిన గ్రేస్ఫుల్ డాన్స్ మూవ్స్ తనను ఎంతగానో ఆకట్టుకున్నాయని పేర్కొన్నారు. ప్రతి ఒక్క అంశంలోనూ చరణ్ అద్భుతంగా రాణించాడని, నా సోదరుడిని చూసి నేను నిజంగా చాలా గర్వపడుతున్నానని, ఈ సినిమాకు లభిస్తున్న చప్పట్లు, ప్రశంసలకు ఆయన వందకు వంద శాతం అర్హుడు అంటూ రామ్ చరణ్పై అల్లు అర్జున్ మనస్ఫూర్తిగా ప్రశంసలు కురిపించారు.
కేవలం రామ్ చరణ్ మాత్రమే కాకుండా, సినిమాలో నటించిన ఇతర నటీనటుల గురించి కూడా అల్లు అర్జున్ ప్రత్యేకంగా మాట్లాడారు. ఈ చిత్రంలో స్ట్రైకింగ్ పర్ఫార్మెన్స్ ఇచ్చిన జగపతి బాబు గారికి, అలాగే సినిమాలో భాగమైన మిగిలిన నటీనటులందరికీ ఆయన అభినందనలు తెలిపారు. ఈ మూవీలో హీరోయిన్గా నటించిన జాన్వీ కపూర్కు తన ప్రేమపూర్వక అభినందనలు తెలియజేస్తూ, చిత్రానికి పనిచేసిన సాంకేతిక నిపుణులందరికీ, నిర్మాతలకు ప్రత్యేకంగా కాంప్లిమెంట్స్ ఇచ్చారు. సినిమాను ఇంత అద్భుతంగా నడిపించిన కెప్టెన్ ఆఫ్ ది షిప్, డైరెక్టర్ బుచ్చిబాబు సానా గారికి నా హృదయపూర్వక అభినందనలు అంటూ, ప్రతి ఒక్కరిని ఎలివేట్ చేస్తూ రామ్ చరణ్ గారిని అత్యున్నత పీఠంపై కూర్చోబెట్టారంటూ బుచ్చిబాబు మేకింగ్ స్టైల్ను అభినందించారు.
చివరగా 'పెద్ది' చిత్ర బృందం మొత్తానికి అల్లు అర్జున్ హృదయపూర్వక శుభాకాంక్షలు తెలుపుతూ ట్వీట్ ముగించారు. మెగా కాంపౌండ్ హీరోల మధ్య ఉన్న ఈ బాండింగ్ చూసి అభిమానులు సోషల్ మీడియాలో పండగ చేసుకుంటున్నారు.
