(మే 20 సిరివెన్నెల సీతారామశాస్త్రి జయంతి సందర్భంగా..)

తెలుగు సినీ ఇండస్ట్రీలో అక్షరానికి ఆయువు పోసి, సామాన్యుడి గుండె చప్పుడిని సైతం తన కలంతో పలికించిన మహోన్నత శిఖరం దివంగత గేయ రచయిత సిరివెన్నెల సీతారామశాస్త్రి. ఆయన రాసిన అద్భుతమైన గీతాలు నేటికీ సంగీత ప్రియులను అలరిస్తూనే ఉన్నాయి. అయితే గతంలో ఒక ఇంటర్వ్యూలో తన కెరీర్, పాటల ప్రస్థానంపై ఆయన చేసిన కొన్ని స్వీయ విమర్శలు, ఆసక్తికర వ్యాఖ్యలు ఇప్పుడు సోషల్ మీడియా వేదికగా మళ్లీ చర్చనీయాంశంగా మారాయి.

తన సుదీర్ఘ సినీ ప్రయాణంలో ఎన్నో ఆణిముత్యాల్లాంటి పాటలను అందించిన శాస్త్రి గారు, అనుభవం పెరిగే కొద్దీ తన పాత రచనలను ఒకసారి వెనక్కి తిరిగి చూసుకునేవాడినని తెలిపారు. ఈ క్రమంలో "ఈ పాట నేను అసలు రాయకుండా ఉంటే బాగుండేది" అని అనుకున్న సందర్భాలు కూడా కొన్ని ఉన్నాయని ఆయన నిర్మొహమాటంగా అంగీకరించారు. వయసుతో పాటు ఆలోచనలు పక్వానికి వచ్చినప్పుడు, గతంలో తాను తెలిసి తెలియక చేసిన కొన్ని పొరపాట్లను గుర్తించడం ఒక రచయితగా తన బాధ్యతని పేర్కొన్నారు.

ముఖ్యంగా ఒకానొక పాటలో తాను రాసిన “సెల్ ఫోన్ లో సొల్లు కారుస్తూ” అనే లైన్ గురించి ప్రస్తావిస్తూ ఆవేదన వ్యక్తం చేశారు. అంతటి గొప్ప భావాలు పలికించే తన కలం నుంచి అలాంటి పదజాలం రావడం తనను తీవ్ర అసంతృప్తికి గురిచేసిందని, కానీ ఆశ్చర్యకరంగా ఆ పాట పెద్ద హిట్ అయిందని గుర్తుచేసుకున్నారు. సమాజంలో అలాంటి పదాలపై కనీసం విమర్శ కూడా రాకపోవడం, శ్రోతలు తనను ఎందుకు ప్రశ్నించలేదని ఆయన ఆశ్చర్యం వ్యక్తం చేశారు.

సినిమాల్లో సందర్భాన్ని బట్టి పాటలు రాసే క్రమంలో ప్రారంభ రోజుల్లో ఒకటి రెండు చోట్ల తాను హద్దులు దాటినట్లు అనిపించిందని సిరివెన్నెల చెప్పుకొచ్చారు. అవి పెద్దగా ప్రజాదరణ పొందకపోవడం ఒక రకంగా మంచిదే అయిందని భావించినట్లు తెలిపారు. శత్రువు కంటే కూడా తనను తాను విమర్శించుకునే వాడే నిజమైన ఎదుగుదలను సాధిస్తాడని, నిరంతర ఆత్మవిమర్శే తనను మరింత మెరుగైన రచయితగా తీర్చిదిద్దిందని ఈ లెజెండరీ కవి స్పష్టం చేశారు.

కె. విశ్వనాథ్ దర్శకత్వంలో వచ్చిన 'సిరివెన్నెల' చిత్రంతో తెలుగు చిత్రసీమకు పరిచయమైన సీతారామశాస్త్రి.. మొదటి సినిమాతోనే తన పేరును ఇంటిపేరుగా మార్చుకున్నారు. శృతిలయలు, గాయం, క్షణక్షణం, నువ్వే కావాలి, త్రివిక్రమ్, రాజమౌళి చిత్రాల వరకు దాదాపు మూడు దశాబ్దాల పాటు వేలాది పాటలతో టాలీవుడ్‌ను ఏలారు. ఆయన పాటల్లోని తాత్వికత, సామాజిక స్పృహ నేటి తరానికి ఎప్పటికీ ఒక మార్గదర్శకంగా నిలుస్తాయి.

ఈ పాత ఇంటర్వ్యూ క్లిప్స్ ప్రస్తుతం నెట్టింట హల్‌చల్ చేస్తుండటంతో నెటిజన్లు, సినీ అభిమానులు లక్ష్మీనారాయణ అవతారమైన ఆ వాగ్దేవి పుత్రుడి గొప్పతనాన్ని కొనియాడుతున్నారు. తప్పులను ఒప్పుకునే అంతటి సంస్కారం, స్వీయ విమర్శ చేసుకునే గొప్ప మనసు ఒక్క సిరివెన్నెల గారికే సాధ్యమని కామెంట్లు పెడుతున్నారు.

అక్షర బ్రహ్మ సిరివెన్నెల భౌతికంగా మన మధ్య లేకపోయినా, ఆయన విడిచివెళ్లిన సాహిత్య సంపద, ఇలాంటి స్ఫూర్తిదాయకమైన ఆలోచనలు టాలీవుడ్ వర్ధమాన రచయితలకు మరియు రాబోయే తరాల కవులకు ఎల్లప్పుడూ దిక్సూచిలా నిలుస్తాయనడంలో ఎలాంటి సందేహం లేదు.