దక్షిణాది చిత్రసీమలో ఒకప్పుడు తనదైన గ్లామర్, అద్భుతమైన నటనతో లక్షలాది మంది ప్రేక్షకుల హృదయాలను కొల్లగొట్టిన నటి దీప (ఉన్ని మేరి). 1970, 80వ దశకాల్లో తెలుగు, తమిళం, మలయాళం, కన్నడ చిత్రాల్లో ఆమె ఒక వెలుగు వెలిగారు. కేరళలోని ఎర్నాకులంలో 1962 మార్చి 12న అగస్టిన్ ఫెర్నాండెజ్, విక్టోరియా దంపతులకు ఆమె జన్మించారు. ఆమె అసలు పేరు ఉన్ని మేరి కాగా, మలయాళంలో అదే పేరుతో హోమ్లీ క్యారెక్టర్లు చేసి మెప్పించారు. అయితే తెలుగు, తమిళ చిత్రసీమలోకి అడుగుపెట్టేసరికి ఆమె తన పేరును 'దీప'గా మార్చుకున్నారు. ఇక్కడ ఆమె గ్లామర్ ఐకాన్గా గుర్తింపు తెచ్చుకోవడం విశేషం. కేవలం 3 సంవత్సరాల వయసులోనే శాస్త్రీయ నృత్యంలో శిక్షణ ప్రారంభించిన దీప, దేశవిదేశాల్లో ఎన్నో స్టేజ్ షోలు ఇచ్చారు. ఆమె తల్లి విక్టోరియా ఒక ప్రొఫెషనల్ బ్యాలెట్ ట్రూప్ను నడిపించేవారు. ఆ కళాకారుల కుటుంబ నేపథ్యమే ఆమెను వెండితెరకు పరిచయం చేసింది.
దీప తన 7వ ఏట 1969లో మలయాళ చిత్రం 'నవవధు' ద్వారా చైల్డ్ ఆర్టిస్ట్గా సినిమా ప్రస్థానాన్ని ప్రారంభించారు. హీరోయిన్గా ఆమె కెరీర్ 1975 నుండి ఊపందుకుంది. తెలుగులో ఆమె 1976లో వచ్చిన 'అమెరికా అమ్మాయి' సినిమాతో ఎంట్రీ ఇచ్చారు. ఈ సినిమాలోని "పాడనా తెనుగు పాట" అనే సాంగ్ ఇప్పటికీ ఎవర్గ్రీన్. ఆ తర్వాత తెలుగు ఇండస్ట్రీలో ఆమె వెనక్కి తిరిగి చూసుకోలేదు. నటరత్న ఎన్టీఆర్ సరసన 'పిల్ల జమీందార్', 'దాన వీర శూర కర్ణ' (ఉత్తర పాత్ర) వంటి సినిమాల్లో నటించి మెప్పించారు. అలాగే సూపర్ స్టార్ కృష్ణతో రంగుల రాట్నం, అక్కినేని నాగేశ్వరరావుతో 'తాతయ్య ప్రేమలీలలు' వంటి క్రేజీ ప్రాజెక్టులలో భాగమయ్యారు. అంతేకాదు, నందమూరి హరికృష్ణ సూపర్ హిట్ మూవీ 'తాతమ్మ కల' చిత్రంలోనూ ఆమె కీలక పాత్ర పోషించారు. మెగాస్టార్ చిరంజీవి కెరీర్ ప్రారంభంలో వచ్చిన 'ప్రేమ లేఖలు' చిత్రంలోనూ దీప హీరోయిన్గా నటించడం విశేషం.
1979లో తమిళంలో వచ్చిన 'రోజాపూ రవిక్కై కారి' సినిమా ఆమె కెరీర్ను మలుపు తిప్పింది. ఆ తర్వాత రజనీకాంత్ సరసన 'జానీ' సినిమాలో భామ పాత్రలో ఆమె నటనకు విమర్శకుల ప్రశంసలు దక్కాయి. కేవలం కమర్షియల్ సినిమాలే కాకుండా, కె విశ్వనాథ్ దర్శకత్వంలో వచ్చిన క్లాసిక్ హిట్ 'స్వాతిముత్యం' సినిమాలో కమల్ హాసన్ వదిన సుబ్బులు పాత్రలో డీగ్లామరైజ్డ్ రోల్ చేసి నటిగా తన విశ్వరూపాన్ని చూపించారు. జంధ్యాల కామెడీ ఎంటర్టైనర్ 'లేడీస్ టైలర్'లో నర్స్ దయ పాత్రలో ఆమె పండించిన కామెడీ థియేటర్లలో నవ్వుల పువ్వులు పూయించింది. తన 23 ఏళ్ల సినీ కెరీర్లో (1969-1992) దీప దాదాపు 150 పైగా చిత్రాల్లో నటించారు. అందులో మలయాళంలోనే 90కు పైగా సినిమాలు ఉండటం విశేషం. ఆమె గ్లామర్ డాల్గా మాత్రమే కాకుండా క్యారెక్టర్ ఆర్టిస్ట్గా కూడా 100% న్యాయం చేశారు.
కెరీర్ పీక్స్లో ఉన్నప్పుడే 1982 మార్చి 12న తన 20వ పుట్టినరోజున ఎర్నాకులం సెయింట్ ఆల్బర్ట్స్ కాలేజ్ ప్రొఫెసర్ రేజోయ్ను దీప వివాహం చేసుకున్నారు. పెళ్లి తర్వాత కూడా కొన్ని సినిమాల్లో నటించిన ఆమె, 1992లో పూర్తిగా చిత్ర పరిశ్రమకు గుడ్బై చెప్పారు. వీరికి నిర్మల్ అనే కుమారుడు ఉన్నాడు. సినిమా రంగుల ప్రపంచానికి దూరంగా జరిగిపోయిన దీప, ప్రస్తుతం ఎర్నాకులంలో పూర్తిగా ప్రైవేట్ జీవితాన్ని గడుపుతున్నారు. సోషల్ మీడియా లేదా పబ్లిక్ ఈవెంట్లకు ఆమె పూర్తిగా దూరంగా ఉంటున్నారు. ఒకప్పటి గ్లామర్ క్వీన్ నేడు సాధారణ గృహిణిగా ప్రశాంతమైన జీవితాన్ని ఆస్వాదిస్తున్నారు. తరాలు మారినా తెలుగు, తమిళ ప్రేక్షకుల గుండెల్లో నటి దీప లేదా ఉన్ని మేరి స్థానం ఎప్పటికీ ప్రత్యేకమే అనడంలో ఎలాంటి సందేహం లేదు.
