బాలీవుడ్‌ స్టార్‌ హీరో రణ్‌వీర్‌ సింగ్‌ కుటుంబంలో విషాదం చోటుచేసుకుంది. ఆయన తల్లి వైపు తాతయ్య డాక్టర్‌ రామ్‌ హింగోరానీ (96) కన్నుమూశారు. వయోభారంతో ఆయన తుదిశ్వాస విడిచారు. దీపావళి పర్వదినం రోజున లక్ష్మీ పూజ నిర్వహిస్తున్న సమయంలోనే ఆయన ప్రశాంతంగా కన్నుమూసినట్లు సమాచారం. ఈ విషయాన్ని రణ్‌వీర్‌ సింగ్‌ కజిన్‌, రామ్‌ హింగోరానీ మనుమరాలు సౌమ్య హింగోరానీ సోషల్‌ మీడియా ద్వారా వెల్లడించారు. దీంతో రణ్‌వీర్‌ కుటుంబంలో విషాద ఛాయలు అలుముకున్నాయి.

తాతయ్య మరణవార్తను తెలియజేస్తూ సౌమ్య హింగోరానీ భావోద్వేగభరితమైన పోస్ట్‌ పెట్టారు. 96 ఏళ్ల పాటు సంపూర్ణమైన జీవితాన్ని గడిపిన ఆయనను తలుచుకుంటూ.. ఇది బాధపడే సమయం మాత్రమే కాదని, ఆయన అద్భుతమైన జీవిత ప్రయాణాన్ని గుర్తుచేసుకోవాల్సిన సందర్భమని పేర్కొన్నారు. అత్యంత పవిత్రమైన లక్ష్మీ పూజ సమయంలో ఆయన తన నానమ్మ చెంతకు చేరుకున్నారని, ప్రపంచంలోనే అత్యుత్తమ తాతయ్యగా ఉన్నందుకు కృతజ్ఞతలు తెలిపారు. ఆమె పోస్ట్‌ కుటుంబ సభ్యుల అనుబంధాన్ని, తాతయ్యపై ఉన్న ప్రేమను తెలియజేస్తోంది.

రణ్‌వీర్‌ సింగ్‌కు కూడా తన తాతయ్యతో ఎంతో ప్రత్యేకమైన అనుబంధం ఉంది. గతంలో తన తాతయ్యతో కలిసి ‘రాకీ ఔర్‌ రాణీ కీ ప్రేమ్‌ కహానీ’ సినిమాలోని ‘వాట్‌ ఝుమ్కా?’ పాటకు రణ్‌వీర్‌ ఉత్సాహంగా డ్యాన్స్‌ చేసిన వీడియో సోషల్‌ మీడియాలో బాగా ఆకట్టుకుంది. వయసును కూడా లెక్కచేయకుండా మనవడితో కలిసి ఆయన చేసిన సందడి నెటిజన్లను అలరించింది. ఆ వీడియో చూసిన అభిమానులకు ఇప్పుడు ఆయన మరణవార్త బాధ కలిగిస్తోంది.

డాక్టర్‌ రామ్‌ హింగోరానీ మరణవార్త తెలియడంతో బాలీవుడ్‌ సినీ ప్రముఖులు, అభిమానులు రణ్‌వీర్‌ సింగ్‌ కుటుంబానికి సంతాపం తెలియజేస్తున్నారు. పండుగ వేళ కుటుంబంలో ఇలాంటి విషాదం చోటుచేసుకోవడం బాధాకరమని నెటిజన్లు స్పందిస్తున్నారు. ఒకవైపు దీపావళి సంబరాలు.. మరోవైపు కుటుంబ పెద్దను కోల్పోయిన బాధ.. రణ్‌వీర్‌ కుటుంబానికి ఇది కష్టమైన సమయంగా మారింది.

 

 

[Ranveer Singh, Ranveer Singh Grandfather, Ranveer Singh Grandfather Death, Dr Ram Hingorani, Ranveer Singh Family News, Ranveer Singh Sad News, Ranveer Singh Cousin Soumya Hingorani, What Jhumka Song, Rocky Aur Rani Kii Prem Kahaani, Bollywood News, Ranveer Singh Latest News]