వెండితెరపై కోట్లాది మంది అభిమానులను సంపాదించుకునే సినీ తారలకు పబ్లిక్ లో తిరిగేటప్పుడు భద్రత అనేది అత్యంత కీలకం. ముఖ్యంగా బాలీవుడ్ సూపర్ స్టార్స్ బయటకు వస్తున్నారంటే చాలు.. వారిని ఒక్కసారి చూసేందుకు జనం ఎగబడుతుంటారు. ఇలాంటి సమయాల్లో తమ అభిమాన హీరోలను కంటికి రెప్పలా కాపాడుతూ, నీడలా వెంట నడిచే బాడీగార్డ్స్ పాత్ర చాలా పెద్దది. అయితే ఈ అంగరక్షకులు తీసుకునే జీతాలు మన దేశంలోని టాప్ కంపెనీల సీఈఓల ప్యాకేజీలకు ఏమాత్రం తీసిపోవు.

ఈ రేసులో అందరికంటే ముందు వరుసలో ఉంటారు బాలీవుడ్ బాద్‌షా షారుఖ్ ఖాన్ వ్యక్తిగత బాడీగార్డ్ రవి సింగ్. చాలా కాలంగా కింగ్ ఖాన్‌కు రక్షణగా ఉంటున్న రవి సింగ్.. ఇండియాలోనే అత్యధిక పారితోషికం అందుకునే సెలబ్రిటీ బాడీగార్డ్‌గా రికార్డు సృష్టించారు. నమ్మదగిన సమాచారం ప్రకారం, ఈయన ఏడాదికి సుమారు రూ. 2.7 కోట్ల నుండి రూ. 3 కోట్ల వరకు జీతంగా అందుకుంటున్నట్లు తెలుస్తోంది.

ఇక ఆ తర్వాత స్థానంలో నిలిచారు టాలీవుడ్, బాలీవుడ్‌లలో మోస్ట్ పాపులర్ అయిన సల్మాన్ ఖాన్ నమ్మకస్థుడు ‘షేరా’ (గుర్మీత్ సింగ్ జాలీ). గత మూడు దశాబ్దాలుగా సల్మాన్‌తో ఒక కుటుంబ సభ్యుడిలా కలిసిపోయిన షేరా.. భాయ్‌జాన్ భద్రత కోసం ఏడాదికి సుమారు రూ. 2.5 కోట్లకు పైగా రెమ్యునరేషన్ తీసుకుంటున్నారట. సల్మాన్ ఎక్కడికి వెళ్లినా ఆయనకు ముందు నిలబడేది షేరానే కావడం విశేషం.

ఇలాంటి భారీ ప్యాకేజీలు అందుకుంటున్న వారిలో మిస్టర్ పర్ఫెక్ట్ అమీర్ ఖాన్ బాడీగార్డ్ యువరాజ్ ఘోర్పడే కూడా ఉన్నారు. అమీర్ రక్షణ బాధ్యతలను చూసుకునే యువరాజ్ ఏడాదికి దాదాపు రూ. 2 కోట్ల వరకు సంపాదిస్తున్నారు. అలాగే బిగ్ బి అమితాబ్ బచ్చన్ వ్యక్తిగత సెక్యూరిటీ ఆఫీసర్ జితేంద్ర షిండే, అక్షయ్ కుమార్ బాడీగార్డ్ శ్రీశ్రేయ్ లు సైతం ఏడాదికి కోటిన్నర రూపాయలకు పైగా వేతనాన్ని పొందుతున్నారు.

ఈ అంగరక్షకుల జీతాల వివరాలు సోషల్ మీడియాలో ఎప్పుడూ హాట్ టాపిక్‌గా మారుతుంటాయి. కేవలం డబ్బు కోసమే కాకుండా, ప్రాణాలకు తెగించి తమను కాపాడే ఇలాంటి నమ్మకస్థులకు స్టార్ హీరోలు కూడా అంతే గౌరవాన్ని, లగ్జరీ జీవితాన్ని బహుమతిగా ఇస్తుంటారు. ఈ బాడీగార్డ్స్ సోషల్ మీడియా అకౌంట్లలో కూడా సెలబ్రిటీల రేంజ్ లోనే ఫాలోయింగ్ సంపాదించుకోవడం విశేషం.