టీవీ నటి నవ్యస్వామికి సోషల్ మీడియాలో మంచి ఫాలోయింగ్ ఉంది. సీరియల్స్ లో నటించే ఈ బ్యూటీ తన అందంతో చాలా మందిని ఆకట్టుకుంది. ఇక నటుడు రవికృష్ణతో ఆమె ప్రేమలో ఉందనే విషయం గురించి తరచూ వార్తలు వస్తూనే ఉంటాయి. ఇలా ఏదొక విషయంలో ఆమె ట్రెండ్ అవుతూ ఉంటుంది. రీసెంట్ గా నవ్యస్వామి అలీతో సరదాగా షోకి గెస్ట్ గా వచ్చింది. గత వారం రిలీజ్ చేసిన ప్రోమోలో కొన్ని ఆసక్తికర సంఘటనలు చెప్పింది. 

ఈవెంట్ మేనేజర్ ను కొట్టానని..ఇప్పుడు బ్రతికి ఉన్నాడో, చచ్చాడో కూడా తెలియదంటూ ఆమె చేసిన కామెంట్స్ వైరల్ అయ్యాయి. తాజాగా ఆ విషయంపై వివరణ ఇచ్చింది. అసలు ఎందుకు కొట్టాల్సి వచ్చిందో చెప్పుకొచ్చింది. స్నేహితులందరితో కలిసి పార్టీకు వెళ్లానని.. అందరం కలిసి డాన్స్ లు చేస్తూ పార్టీ చేసుకుంటున్నామని చెప్పింది. అలాంటి సమయంలో ఈవెంట్ మేనేజర్ వచ్చి తనను వెనుక నుండి అసభ్యంగా తాకాడని.. దాంతో వెంటనే వెనక్కి తిరిగి వాడిని తోసేసి చితక్కొట్టేశానని తెలిపింది. 

వాడిని కొట్టిన కొట్టుడుకి తన చేతి వేళ్లు వాచిపోయాయని.. ఇక ఆ ఘటనతో తనకు ఎంతో భయం వేసిందని.. ఇంటికి వెళ్లి ఏడ్చేశానని చెప్పుకొచ్చింది. ఎవరో వచ్చి మనల్ని అసభ్యంగా తాకితే ఎలా ఉంటుందని నవ్యస్వామి అసలు విషయం చెప్పుకొచ్చింది. ఇక చాలా కాలంగా సినిమాల్లో కనిపించాలని ఉందని.. కానీ ఇప్పుడు సీరియల్స్ తో బిజీగా ఉన్నానని చెప్పుకొచ్చింది. సినిమా ఆఫర్లు కూడా వస్తున్నాయని.. కానీ దానికి ఇంకా సమయం ఉందని తెలిపింది.